• London

  • Beirut

  • Moscow

  • Los Angeles

  • Paris

  • Sydney

  • Toronto

Իթ Մասթ Հէւ Պիին Լաւ – Ռոքսեթ (It Must Have Been Love – Roxette ) (լուսանկարներ, տեսերիզ)

10.07.2019   02:41

ԱՆԱՀԻՏ ԿՕՇԿԱՐԵԱՆ

«Զարթօնք»ի Աշխատակից

Ռոքսէթ խումբը  եւրոպական այն քիչ խումբերէն է որ Միացեալ Նահանգներու մէջ մեծ հռչակ կը վայելէր 80-ական , 90-ական թուականներուն։ Անոնց հիթերը մի քանի տարին անգամ մը նահանգներու մէջ կը դառնային թիւ մէկ հիթ՝ ձայնասփիւռի բոլոր եթերներուն եւ հիթ-շքերթներուն։ Այդպէս եղաւ եւ  It Must Have Been Love երգի  պարագային։

            Անիկա «Սիրուն Կինը» (Pretty Woman) ֆիլմին ուղեկցող երգերէն (soundtrack) մէկն է ։ Երգի հեղինակն է  խումբի անդամ Բեր Կէսլեն։ Երգը գրուած է ֆիլմի նկարահանումը սկսելէն շատ աւելի վաղ։ Նախնական տարբերակը կը կոչուէր  Christmas for the Broken Hearted , որ ձայնագրուած էր 1987 թուականին,  երբ  բրիտանական խոշոր ձայնագրող-թողարկող EMI  ընկերութեան գերմանական մասնաճիւղը անոնց խնդրեց գրել Սուրբ Ծննդեան նուիրուած խորիմաստ երգ մը։ Երգը անմիջապէս հիթ դարձաւ անոնց հայրենիք Շուէտի մէջ, սակայն EMI-Գերմանիան հրաժարեցաւ զայն թողարկել որպէս սինկլ եւ մինչեւ 1997 թուական անիկա չմտաւ Ռոքսէթ խումբի որեւէ ալպոմի մէջ։ Միայն 1997 թուականին, երբ «Սիրուն Կինը» ֆիլմը արդէն թողարկուած էր եւ մեծ յաջողութիւն  ունեցած, երգը որպէս «պոնուս-թրէք» մտաւ իրենց  Pearls of Passion ալպոմի երկրորդ երեսին մէջ։

            Քանի որ  90-ականներու սկիզբը շուէտական այս խումբը մեծ ճանաչում ունէր, իսկ անոնց հիթերը ժամանակ առ ժամանակ կը զբաղեցնէին ԱՄՆ-ի հիթ շքերթներու առաջին հորիզոնականները։ Ֆիլմի աշխատանքները սկսելու ժամանակ Touchstone Pictures ֆիլմերու ընկերութիւնը իրենց առաջարկեց գրել երգ մը, որ մտնէ ֆիլմի երգերու շարքին մէջ։ Կէսլեն կը պատմէ, որ երգը գրելու առաջարկը ստանալու պահուն իրենք համերգային շրջագայութեան մէջ էին Աւստրալիա եւ Նոր Զելանտա, եւ ֆիզիքապէս չէին հասցներ գրել նոր երգ, գործիքաւորել եւ ձայնագրել, հասցնելով նշուած ժամանակին։ Այդ պատճառով  որոշեցին փոխել երգի սուրբ ծննդեան մասին երգուող քառատողը, աւելցնել պէք-վոկալ՝  աւելի ճոխ հնչողութեան համար եւ փոխել երգի անուանումը։ Հնարքը աշխատեցաւ։

            Ֆիլմի թողարկուելէն ետք երգը դարձաւ համաշխարհային հիթ եւ միայն ԱՄՆ-ի մէջ մէկ ամսուան ընթացքին վաճառուեցաւ 500 000 օրինակով։

            Ռոքսէթը երգը ձայնագրեց եւս մի քանի տարբերակներով․ անոնցմէ մէկն էր քիչ աւելի դանդաղ կատարումը, իսկ նախաբանի դաշնամուրային հատուածը փոխարինուեցաւ կիթառի կատարմամբ, ինչպէս նաեւ սպաներէն լեզուով սպանական տարբերակը։

            Ռոքսէթէն բացի երգը վերաերգեցին բրիտանական, ռուսական, մեքսիքական , սպանական, գերմանական  այլ ազգի կատարողներ։ Երգը մինչ օրս չէ կորսնցուցած  իր հետաքրքրութիւնը եւ կը  շարունակէ հնչել թէ՛ բնօրինակ, եւ թէ՛ վերաերգուած տարբերակներով։ Զայն նոյնիսկ կ’օգտագործեն մերօրեայ DJ-ները՝ երաժշտական համադրումներ ստեղծելու համար։

Երգի հոլովակը նկարահանուած է ֆիլմի ընդհանուր տրամադրութեան համապատասխան՝ շատ ռոմանթիք եւ խորհրդաւոր։ Հոլովակի մէջ գրեթէ ամբողջութեամբ օգտագործուած են տեսարաններ ֆիլմէն, զոր աւելի գեղեցկացուցած է։

Եւ, ինչպէս միշտ՝ երգը յարատեւ է, քանի զայն լսող կայ։ It Must Have Been Love երգը այդ երգերու շարքին կը պատկանի մինչ օրս ։

Share Button

Leave a Reply

Your email address will not be published. Required fields are marked *

Լրատուութեան գործընկեր