• London

  • Beirut

  • Moscow

  • Los Angeles

  • Paris

  • Sydney

  • Toronto

Ամերիկեան Բարքեր (լուսանկարներ)

12.04.2019   00:56

ԳԷՈՐԳ ՔԷՕՇԿԷՐԵԱՆ

«Զարթօնք»ի Երէց Աշխատակից

Շուներու Յատուկ Թանգարա՞ն . . .

Հասկնալի է, որ շուներն ու այլ կենդանիները ունենան իրենց հիւանդանոցը, ուր բուժուելու կ՛երթան։ Հասկնալի է, որ անասունները ունենան իրենց գերեզմանատունը, ուր պէտք է թաղուին։ Հասկնալի է նաեւ, որ անասունները ունենան իրենց պանդոկը, ուր հանգստանալու կ՛երթան՝ երբ իրենց տէրերը արձակուրդով բացակային տունէն։

Սակայն հասկնալի չէ երբեք, որ շուները ունենան իրենց թանգարանը, ուր ցուցադրուին իրենց պատկերներն ու արձանները (տես նկարները) . . . Եւ ահա 32 տարուան բացակայութենէ մը ետք, «Շուներու Թանգարան»ը կը վերադառնայ Նիւ Եորք՝ այս տարուան Փետրուար ամսուան 8-ին։

Մինչ այդ, վերոյիշեալ թանգարանը կը գործէր Լուիզիանա նահանգի Սէյնթ Լուիզ քաղաքին մէջ, ուր հետաքրքրութիւնը նուազած ըլլալու պատճառով թանգարանը վերադարձաւ իր տունը՝ Նիւ Եորք, Մէնհէթըն կղզիի նշանաւոր Փարք պողոտային վրայ։

Հետաքրքրական է գիտնալ, որ այս թանգարանը կը հովանաւորուի American Kennel Club-ին կողմէ։ Թանգարանի մուտքի արժէքն է չափահասներու համար 15 տոլար, 12 տարեկանէն վար փոքրիկներու համար 5 տոլար, իսկ աշակերտներու, մեծահասակներու եւ վեթերաններու համար  10 տոլար։

Նիւ Եորքի «վերակենդանացած» այս երկու յարկանի թանգարանին մէջ կան երկու իւրայատուկ ցուցադրութիւններ, որ յատկապէս կը գրաւեն այցելուին հետաքրքրութիւնը։ Հիմա թոյլ տուէք բացատրեմ թէ ինչ են անոնք։

Արդարեւ՝ անոնցմէ առաջինը կը կոչուի «Գտիր Նմանդ» (Find Your Match): Սա խցիկ մըն է ուր մտնելով պէտք է ըսես «Woof», որուն հիման վրայ կը նկարուիս եւ մեքենան քեզի կը յայտնէ շունի տեսակի քու նմանդ, այսինքն՝ French Poodle, Australian Terrier, German Shepherd եւ այլն . . . Մարդիկ կարծես շատ պէտք ունին նմանելու շուներու!

Իսկ երկրորդը կը կոչուի «Meet the Breeds», որ քեզի կը յայտնէ նախընտրածդ շունի տեսակի կերպարը, յատկութիւններն ու անոր սերունդի պատմութիւնը։ Շուն սիրողներուն համար կ՛երեւի կարեւոր է այս մէկը, բայց զիս չի հետաքրքրեր երբեք ու վերջ։

«Խելագար Մազի Օր», Crazy Hair Day . . .

Ամերիկեան օրացոյցին մէջ կան իւրայատուկ օրեր երբ պետական պաշտօնատեղիներն ու հանրային դպրոցները փակ կը մնան, յիշատակելու այդ օրերուն զուգադիպող տօները։ Օրինակ՝ Մարթին Լուտըր Քինկ Օր, Նախագահներու Օր, Նահատակաց Օր, Բանուորական Օր, Վեթերաններու Օր եւ այլն։

Յիշատակութեան արժանի աւանդական այդ օրերուն կողքին վերջերս աւելցած են «շինծու» օրեր, զանազանութիւն բերելու մարդոց ընկերային կեանքի միօրինակ եւ ձանձրացուցիչ պայմաններուն։ Օրինակ՝ զաւակդ հետդ գործի բերելու օր, ընտանի կենդանիդ հետդ գործի բերելու օր եւ այլն։

Այդ «շինծու» օրերու վերջին նորաձեւութիւնն է «Խելագար Մազի Օր»ը, ըստ որուն՝ դպրոցական աշակերտներ կրնան դպրոց յաճախել իրենց նախընտրած մազի սանտրուածքով կամ հիւսուածքով . . . Ինչո՞ւ, գոհացում տալու համար կարգ մը մայրերու «չնաշխարհիկ» գաղափարներուն։

Վերոյիշեալ մայրերը կը բնակին Թէքսաս նահանգի Հիւսթըն քաղաքը։ Ստորեւ՝ մի քանի օրինակ այդ մազերու արտասովոր հիւսուածքներէն։

Առաջինը (տես նկարը) կը ներկայացնէ «The Little Mermaid» ֆիլմի ջրահարսը, որ կը կոչուի Արիէլ։ Այս մէկը շահած է առաջնութիւնը։ Երկրորդը (տես նկարը) կը ներկայացնէ կաղանդի ծառը, իր զարդարանքներով։ Ուրիշ աղջկայ մը մազի հիւսուածքը կը ներկայացնէ վանդակ մը, որուն մէջ կ՛երեւի դեղձանիկ մը եւ այսպէս տասնեակ մը ուրիշ հիւսուածքներ, որոնք կը փաստեն, թէ որքան սուր են մայրերու երեւակայութիւնները!

Բայց ի՜նչ պէտք կայ մայրերու հաճոյքին գոհացում տալու համար չարչրկել երեխաները, որոնք մազերու այդ հիւսուածքներով օր մը ամբողջ պիտի տառապին՝ որ չխանգարեն եւ կանգուն պահեն այդ «շինութիւնները»։ Ես պիտի ձայնակցիմ Շէյքսպիրին, որ կ՛ըսէ, «Բազում աղմուկ՝ վասն ոչինչի» եւ կը ձգեմ դատաստանը ընթերցողի հայեցողութեան։ Շնորհակալութիւն եւ վերջ։

 

 

 

Share Button

Leave a Reply

Your email address will not be published. Required fields are marked *

Լրատուութեան գործընկեր