• London

  • Beirut

  • Moscow

  • Los Angeles

  • Paris

  • Sydney

  • Toronto

«My Funny Valentine» (լուսանկարներ, տեսերիզ)

13.02.2019   00:39

Երգի Մը Պատմութիւնը – 5 –

ԱՆԱՀԻՏ ԿՕՇԿԱՐԵԱՆ

«Զարթօնք»ի Աշխատակից

 

Բազմաթիւ գեղեցիկ երգեր կան սիրոյ մասին, բայց սիրահար զոյգի, գեղեցիկ սիրային պատմութեան, սիրահարներու օրուան  մասին խօսելու ժամանակ  ակամայ  կը յիշատակենք  «My Funny Valentine» երգը։

Մեղեդային, ծորուն, այնքան գեղեցիկ այս երգը իր  80-ամեայ կեանքին ընթացքին   ունեցած է աւելի քան 1300 տարբերակ՝  կրելով բազմապիսի փոփոխութիւններ, ընդունելով բազմաթիւ  ոճային փոխակերպումներ։  Երեւակայութիւնն ու բառերը բաւարար չեն նկարագրելու համար  այս քնքուշ երգի փոխանցած ողջ նրբագեղութիւնը։

Տարիներէ ի վեր ան որպէս կանոն կը հնչէ կաթոլիկ աշխարհի (եւ ոչ միայն) սիրելի տօներէն մէկուն՝ սբ. Վալենթայնի տօնին, ինչը կը համարեն բոլոր սիրահարներու տօնը: Անկեղծ ըսած, երգը առաջին անգամ լսելու ատեն կը թուի, թէ այս տօնին  նուիրուած է անոր ստեղծման նախապատմութիւնը։  Ան  անմիջապէս կը զուգորդուի  սիրահար զոյգի, ռոմանթիկ երեկոյի, վարդերու, բացիկներու, տուրմի եւ փրփրուն գինիի հետ,  ինչպէս եւ սովորաբար կ’ըլլայ  սբ. Վալենթայնի տօնին։ Սակայն «Ֆանի Վալենթայնը»  խորքին մէջ 1937 թուականին  Ռիչարտ Ռոճերսի եւ  Լորենց Հարթի գրած «Զրահներով մանուկներ» («Babes in Arms») միւզիքլին  մէջ հնչող բազմաթիւ երգերէն մէկն էր, որ կ’երգէր դեռահաս աղջնակը իր սիրեցեալ պատանեակին համար, որուն, ի դէպ, միւզիքլին մէջ ստիպուած եղան անուանափոխելու Վալենթայն (Վալ), որպէսզի բառախաղը յաջողի։ Երգին բառերը հակասական եւ հումորային բնոյթ կը կրեն, որոնք, սակայն, կապակցուելով կը ստեղծեն բառախաղ եւ կը ստանան իմաստ։ Բառերը այլ լեզուներով թարգմանելու բոլոր փորձերը ձախողած են, որովհետեւ անմիջապէս կորսնցուցած են իրենց իմաստը։ Միւզիքլը Պրոտուեյի մէջ բեմականացուած է   289 անգամ, որմէ ետք փակուեցաւ,  թէեւ տասնամեակներ անց անիկա դարձեալ կը հնչէ նիւեորքեան թատրոններուն մէջ։

«My Funny Valentine»-ը  միւզիքլէն անկախ երգ դարձաւ եւ երկրորդ կեանք մը ստացաւ, երբ 15 տարի անց՝  1952 թուականին,  զայն ձայնագրեց Չետ Պեյքերը,  իսկ 2  տարի անց՝ Ֆրենք Սինաթրան։  Իր կատարումէն ետք երգը անմիջապէս տարածուեցաւ եւ դարձաւ յայտնի ու սիրելի։  Այս երգը կարատած են  Էլլա Ֆիցժերալտը, Մայլս Տեվիսը, Պարպարա Սթեյզնտը, Սթինկը, Էթթա Ճեյմսը , Լինտա Ռոսենթալտը, Թոնի Պեննեթը եւ բազմաթիւ այլ երգիչներ։

Ամերիկեան երաժշտական թատրոնի եւ շարժապատկերի արդիւնաբերութեան  մէջ  թերեւս չկայ Ռիչըրտ Ռոճերսին համարժէք երաժշտահան։ Իր վաթսունամեայ  ստեղծագործական գործունէութեան ընթացքին ան գրած է  աւելի քան 900 երգ, պրոտուէյեան 43  միւզիքլ, երաժշտութիւն ֆիլմերու եւ հեռուստատեսութեան համար։ Ռոճերսը այն երկու եզակի անձերէն մէկն էր, որ կը հանդիսանար Օսքար, Կրեմմի, Էմիի, Թոննի եւ Փուլիցերեան մրցանակներու մրցանակակիրը։   

 

Share Button

Leave a Reply

Your email address will not be published. Required fields are marked *

Լրատուութեան գործընկեր