• London

  • Beirut

  • Moscow

  • Los Angeles

  • Paris

  • Sydney

  • Toronto

Արցախը Նախորդ Շաբաթ (լուսանկարներ)

12.02.2019   01:26

ՆՈՐԱՅՐ ՅՈՎՍԷՓԵԱՆ

«Զարթօնք»ի Արցախի Աշխատակից

Սահմանը Ամուր Է, Սահմանապահ Թալիշն Ալ Կը Կառուցուի

Արցախի Հանրապետութեան նախագահ Բակօ Սահակեան Փետրուար 5-ին պաշտպանութեան նախարար Կարէն Աբրահամեանի եւ այլ պաշտօնեաներու ուղեկցութեամբ այցելած է հանրապետութեան արեւելեան սահմանագիծի տարբեր հատուածներ, տեղնուտեղը ծանօթացած է զինուորներու ծառայութեան ընթացքին եւ տիրող իրավիճակին: Նոյն օրը նախագահը այցելած է Մարտակերտի շրջանի Թալիշ գիւղը եւ ունեցած է աշխատանքային խորհրդակցութիւն բնակավայրի վերականգնումին առնչուող խնդիրներուն շուրջ: Բակօ Սահակեան յանձնարարականներ տուած է շահագրգիռ մարմիններու ղեկավարներուն՝ քննարկուած հարցերուն պատշաճ լուծման ուղղութեամբ՝ նշելով Թալիշի վերականգնումի ծրագիրին կարեւորութիւնը Արցախի համար:

Առաջնագիծի արեւելեան հատուածին մէջ նախագահ Սահակեանին զեկուցած են, որ վերջին շրջանին շփման գիծի այս մասին մէջ ալ ծառայութիւնը կ’անցնի, նախորդ ամիսներուն համեմատ, աւելի հանգիստ. հակառակորդը հրադադարի ռեժիմը աւելի քիչ կը խախտէ: Դիրքապահները, սակայն, զգօնութիւնը չեն թուլցներ. ժամանակակից միջոցներով ոչ միայն առաջնագիծին վրայ, այլեւ բաւական մեծ խորութեամբ հակառակորդին կը դիտարկեն շուրջօրեայ: «Մենք առաջնագիծին վրայ ենք: Ամէն ինչ կը կատարուի ամենայն զգօնութեամբ: Եւ ուշադրութիւնը չի շեղուիր այդ հանդարտութենէն»,- կը վստահեցնէ ՊԲ կրտսեր հրամանատարակազմէն Արմէն Գէորգեանը:

Բարելաւուած են նաեւ կենցաղային պայմանները: Արդէն թէյի սեղանին շուրջ նախագահ Բակօ Սահակեանին մանրամասնութիւններ ներկայացուցած է պաշտպանութեան նախարար Կարէն Աբրահամեանը: Այդ մէկը հաստատած են դիրքապահները. եւ սնունդէն են գոհ, եւ կենցաղային պայմաններէն, կը հաստատէ Արմէն Գէորգեանը. «Ամէն ինչ շատ լաւ է: Ստեղծուած են բոլոր պայմանները, որ զինուորը ինքզինք լաւ զգայ մարտական դիրքերուն վրայ: Չունինք բողոքներ՝ կապուած մարտական դիրքերու կամ հերթապահութեան հետ: Ամէն ինչ շատ հոյակապ կ’անցնի»:

Դիրքապահներու թիկունքին Թալիշն է, որ կը շարունակէ Արցախի ամենամեծ շինարարական հարթակներէն մէկը մնալ:   Բակօ Սահակեան Թալիշի մէջ աշխատանքային խորհրդակցութիւն ունեցած է՝ նուիրուած գիւղի վերականգնումի ծրագիրին: Պատասխանատուները կատարուածը ներկայացուցած են: Դպրոցի ու մանկապարտէզի շինարարութիւնը շուտով կ’աւարտի: Համայնքային կեդրոնն ու հանդիսութիւններու տունը աւելի կանուխ կառուցուած էին: 37 առանձնատուն արդէն կը սպասէ բնակիչներուն: «Հնարաւորութիւն կ’ունենան բոլոր դպրոցական եւ նախադպրոցական տարիքի երեխայ ունեցող ընտանիքները, ինչպէս նաեւ մանկավարժներու ընտանիքները միանգամայն տեղափոխուելու Թալիշ, եւ յոյսով եմ,  որ արդէն Սեպտեմբեր 1-ին կը վերաբացուի Թալիշի միջնակարգ դպրոցը»,- լաւատեսութիւնը չի թաքցներ Թալիշի համայնքի ղեկավար Վիլէն Պետրոսեանը:

            Թալիշի մէջ շինարարական աշխատանքները կ’աւարտին Յուլիսին: Մինչ այդ Թալիշի մէջ կը կառուցուի 10 բնակարան, կ’ասֆալթապատուի Մարտակերտ-Մատաղիս ուղին:

 

Ստեփանակերտի Մէջ Պատիժը Կրած Ազրպէյճանցին Ազատ Արձակուած Է. Ան Կը Տեղափոխուի Երրորդ Երկիր

Ստեփանակերտի Օրինապաշտութիւնը Ընդդէմ Պաքուի Ցեղապաշտութեան

Փետրուար 2-ին Էլնուր Հուսեյնզատէն ազատ արձակուեցաւ: Արցախի պետական սահմանը ապօրինի անցնելուն համար ան երկու տարուան ազատազրկումի դատապարտուած էր, եւ ազատ արձակուեցաւ՝ երկու տարին լրանալէն ետք: Կը թուի, թէ որեւէ արտակարգ բան չէ պատահած, սակայն յարակից զարգացումներն ու մեկնաբանութիւնները կը յուշեն, որ այդ դրուագին մէջ ամէն ինչ այնքան ալ պարզ չէ, որքան կողմնակի դիտողին կրնայ թուալ առաջին հայեացքէն:

Սովորական դատապարտեալի մը պէս պատժաժամկէտը լրանալէ ետք, ազրպէյճանցի Էլնուր Հուսեյնզատէն դուրս եկաւ Արցախի քրէակատարողական  հիմնարկներէն մէկէն: Արցախի նախագահին աշխատակազմի տեղեկատուութեան գլխաւոր վարչութեան պետ Դաւիթ Պապայեանը կատարուածը կարճ կը բնութագրէ. «Սա օրէնքի պահանջն է: Անկախ կրօնական, ազգային պատկանելութենէն՝ օրէնքի պահանջը պէտք է յարգել»: Նոյն կարծիքին է նաեւ Մարդու իրաւունքներու պաշտպանը: Արցախը ընտրած է իրաւական երկիր ըլլալու ուղին ու այդ տրամաբանութեամբ կը վարուի: «Սա ցոյց կու տայ, որ քաղաքական առեւտուրի առարկայ չենք դարձներ մարդու ճակատագիրը՝ անկախ ազգութենէն, քաղաքացիութենէն, ինչը իրաւական պետութեան մը համար բնորոշ գործընթաց է»,- կ’ընդգծէ Արցախի Մարդու իրաւունքներու պաշտպան Արտակ Բեկլարեանը:

Էլնուր Հուսեյնզատէի հետ կապուած պատմութիւնը սկսաւ երկու տարի առաջ: Ազրպէյճանի զինուած ուժերու 157-րդ հրաձգային միաւորումի հետախուզական վաշտի զինծառայող Էլնուր Հուսեյնզատէն 2017 թուականի Փետրուար 1-ին Թալիշ համայնքի ուղղութեամբ ապօրինի հատած էր Արցախի Հանրապետութեան  պետական սահմանը եւ  ձերբակալուած էր սահմանի հսկողութիւնը իրականացնող  ստորաբաժանումի ծառայողներուն կողմէ: «Առանձին նպատակ չէ եղած: Այստեղ ալ ըսած եմ: Պարզապէս ընտանեկան խնդիրներ եղած են ու նաեւ խնդիրներ՝ ծառայութեան վայրը: Ինծի հանդէպ անյարգալից վերաբերում ունէին»,- ազատ արձակուելէ ետք տուած հարցազրոյցին մէջ կը վերյիշէր Էլնուր Հուսեյնզատէն: Արցախի Հանրապետութեան ընդհանուր իրաւասութեան առաջին ատեանի դատարանին դատավիճռով  դատապարտուած է երկու տարուան ազատազրկումի եւ կրած պատիժը: «Այստեղ ոչ մէկ խնդիր եղած է: Բանտը, դատախազութեան մէջ եւ հրամանատարները՝ բոլորը ինծի հետ յարգանքով վարուած էին: Ես կ’ըսեմ այն ինչ որ եղած է»,- կը վստահեցնէ ան: Բժիշկներու ուշադրութեան պակաս ալ չէ եղած: Այցելած են պարբերաբար: «Կարմիր խաչէն ալ այցելած են, այստեղի բժիշկներն ալ այցելած են: Հարցուցած են՝ խնդիրներ ունի՞մ, թէ չէ: Այստեղ օրէնքներուն կը հետեւին»,- կը պատմէ Էլնուրը:

Անցած երկու տարուան ընթացքին Հուսեյնզատէի հանդէպ նոյնքան ուշադիր չեն եղած հայրենի իշխանութիւնները: Ազրպէյճանէն նախ յայտարարեցին, որ ան զինուորական չէ, յետոյ համաձայնեցան, որ զինուորական է, բայց մտաւոր խնդիրներ ունի եւ այսպէս շարունակ: Երկու տարուան ընթացքին Էլնուր Հուսեյնզատէն վերադարձնելու էական փորձի մը չձեռնարկեցին Պաքուի ներկայացուցիչները: Պարբերաբար Տիլհամ Ասքերովի եւ Շահպազ Կուլիեւի համար ջանք թափող պաշտօնեաները ակներեւ խնդիր չունէին զբաղելու նաեւ Էլնուր Հուսեյնզատէով: Սա անհասկնալի է յատկապէս, երբ Ազրպէյճանը հաւանական բոլոր հարթակներուն վրայ կը փորձէ վերոյիշեալները որպէս խաղաղ բնակիչ ներկայացնել, իսկ Էլնուրը՝ լաւ թէ վատ զինուորական: Ամէն պարագայի, ապօրինի սահմանախախտումի համար Արցախի մէջ պատիժը կրող ազրպէյճանցի երիտասարդը արդէն իսկ գիտէր, որ վերադառնալէ ետք հայրենիքի մէջ խնդիրներ պիտի ունենայ: Պատժաչափը լրանալու նախօրէին նամակով դիմած է Արցախի նախագահին՝ խնդրելով զինք չյանձնել Ազրպէյճանին: «Չեմ ուզեր Ազրպէյճան վերադառնալ: Աւելի կանուխ ըսած էի, հիմա ալ կ’ըսեմ: Ազրպէյճան չեմ ուզեր երթալ: Կամ երրորդ երկիր թող ուղարկեն զիս, կամ թոյլ տան, որ այստեղ մնամ: Այստեղ ըսածներուս համար կամ այլ պատճառներով հաւանական է, որ զիս բանտարկեն, սպաննեն: Թերեւս ալ որեւէ բան չընեն:  Բայց ես կը մտածեմ, որ ճիշդ խօսելուս համար կրնամ խնդիրներ ունենալ»,- դիմումին մէջ գրածը անգամ մըն ալ բանաւոր կը հաստատէ Հուսեյնզատէն:

Ստեփանակերտի մէջ նախընտրեցին պատժաչափը կրած ազրպէյճանցի զինծառայողը երրորդ երկիր ուղարկել: «Սա փոխանակում չէ,- կ’ընդգծէ Դաւիթ Պապայեան,- այլ բարի կամքի դրսեւորում Ստեփանակերտի կողմէ: Ճիշդ է, կ’ըսեն, որ կարելի էր փոխանակել: Բայց նախ եւ առաջ Ազրպէյճանը չի ցանկար այդ մէկը: Միւս կողմէ՝ այդ մարդը չի ցանկար վերադառնալ Ազրպէյճան»:

Որ հայրենիքի մէջ իրեն գրկաբաց չեն սպասեր, Էլնուրին նաեւ Ազրպէյճանէն հնչած յայտարարութիւնները յուշած են. Պաքուի մէջ յիշած են, որ Ազրպէյճանի ՔՕ 274 յօդուածով Էլնուր Հուսեյնզատէին պետական դաւաճանութեան համար մեղադրանք առաջադրուած է դեռ 2017-ին, եւ որ ան կը գտնուի հետախուզութեան մէջ: Երրորդ երկիր ուղարկելու գործընթացը արդէն մեկնարկած է: Թէ ո՛ր երկիրը, գաղտնի կը պահուի՝ Էլնուր Հուսեյնզատէի անվտանգութիւնը հաշուի առնելով:

Կը թուի, թէ թեման այդքանով գոնէ պէտք է փակուէր, բայց Պաքուի մէջ դարձեալ յիշեցին Արցախի մէջ կատարած ծանր յանցագործութիւններու համար իրենց պատիժը կրող Տիլհամ Ասքերովը եւ Շահպազ Կուլիեւը: Եւ այնքան ոգեւորուած յիշեցին, որ Արցախի արտաքին գործոց նախարարութեան տեղեկատուութեան եւ հասարակայնութեան հետ կապերու վարչութեան պետ Արտակ Ներսիսեանը մեկնաբանած է Ազրպէյճանի ԱԳՆ-ի վերջերս կատարած յայտարարութիւնը առ այն, թէ Պաքուն Հայաստանէն կ’ակնկալէ նաեւ Ազրպէյճանի միւս երկու քաղաքացիներուն ազատ արձակումը։ «Նախ եւ առաջ, անհրաժեշտ կը համարենք նշել, որ այս հարցով Հայաստանին դիմելը  զուրկ է որեւէ հիմքէ։ Արցախի մէջ դատապարտուած ազրպէյճանցի յանցագործներուն խնդրով  պաշտօնական Պաքուին անհրաժեշտ է ուղղակիօրէն դիմել պաշտօնական Ստեփանակերտին, որ դեռ անցեալ տարուան Դեկտեմբերին որպէս բարի կամքի դրսեւորում՝  պատրաստակամութիւն յայտնած էր օրէնքի ծիրէն ներս դիտարկել Ազրպէյճանի քաղաքացի Էլնուր Հուսեյնզատէն վաղաժամկէտ ազատ արձակելու հնարաւորութիւնը, որ Արցախի տարածքին ծանր կամ առանձնակի ծանր յանցանք չէ գործած։ Ինչ կը վերաբերի Ազրպէյճանի կողմէ մարդասիրական թեմաներով շահարկումներուն, ապա անհրաժեշտ է նշել, որ ծանր յանցագործութիւն կատարած անձանց վերաբերող հարցերը կը գտնուին այլ հարթութեան վրայ։ Ազրպէյճանի կողմէ յիշատակուող Տիլհամ Ասքերովը եւ Շահպազ Կուլիեւը յանցագործներ են, որոնք մեղաւոր ճանչցուած են ազգային ատելութեան շարժառիթներով անչափահասի առեւանգումի, սպանութեան եւ շարք մը այլ յանցագործութիւններու մէջ»,- ըսուած է Արցախի արտաքին գործոց նախարարութեան տարածած մեկնաբանութեան մէջ:

Ի դէպ, Արցախ գտնուող ազրպէյճանցիներուն թիւը կրնայ աւելնալ մէկ հոգիով: Ոչ պաշտօնական աղբիւրներու համաձայն՝ Ազրպէյճանի Հանրապետութեան քաղաքացի Ռաշատ Ալիզատէն դիմած է Արցախի Հանրապետութեան արտաքին գործոց նախարարութեան՝ Արցախի Հանրապետութեան քաղաքացիութիւն ստանալու խնդրանքով: Արտաքին գործոց նախարարութենէն այդ փաստը ոչ հաստատեցին եւ ոչ ալ հերքեցին: Փոխարէնը, ֆէյսպուքեան օգտատէր Ալէն Ղուլեան մի քանի մանրամասնութիւն ներկայացուցած է այդ անձնաւորութեան վերաբերեալ, որոնք անուղղակիօրէն կը վկայեն ազրպէյճանական յատուկ ծառայութիւններուն հետ անոր սերտ կապերուն մասին:

Ստեփանակերտ

Share Button

Leave a Reply

Your email address will not be published. Required fields are marked *

Լրատուութեան գործընկեր