• London

  • Beirut

  • Moscow

  • Los Angeles

  • Paris

  • Sydney

  • Toronto

Լոռի Մարզին Մէջ Արտակարգ Դէպքերու Թիւը Աճած Է

08.02.2019   01:18

«Գաւառը» Լուսարձակի Տակ – 13 –

ՎԱՀԱՆ ԱՆՏՈՆԵԱՆ

«Զարթօնք»ի Աշխատակից

 

Լոռիի մարզային փրկարարական վարչութեան ներկայացուցած տուեալներով՝ 2018 թուականին արտակարգ դէպքերու թիւը 2017-ի հետ համեմատած աւելցած է 283-ով եւ կազմած 1258 պատահար: Զոհերու թիւը բարեբախտաբար անցեալ տարուան համեմատ պակսած է տասով եւ կազմած 35 զոհ: Նիւթական վնասը կազմած է աւելի քան 135 միլիոն դրամ, որ 42.5 միլիոնով պակաս է նախորդ տարուան թիւէն:

Արտակարգ դէպք ըսելով պէտք է հասկնալ լեռներէն քարակտորներու թափում, որուն հետեւանքով միջքաղաքային` Վանաձոր-Ալավերտի ճանապարհի փակում, նաեւ ջրհեղեղ, հրդեհ, ինքնաշարժներու բախում եւն: Պետութեան մէջ կը գործէ փրկարարական կազմակերպութիւն մը Արտակարգ իրավիճակներու նախարարութիւն  «ԱԻՆ» անուան տակ:

Լոռիի մարզային փրկարարական վարչութեան ճգնաժամային  կառավարումի կեդրոնի պետ Կարէն Յովհաննիսեան իր ելոյթին մէջ նշեց, որ 2018-ին իրենց վրայ դրուած բոլոր խնդիրները յաջողութեամբ լուծուած են: Լոռիի մարզպետ Անդրէաս Ղուկասեանի այն հարցին, թէ կարելի՞ է արդեօք պատահարներու հետեւանքները վերացնելու փոխարէն նախապէս  ծրագիր կազմել կանխարգիլելու քարաթափումները, վարչութեան պետը պատասխանեց , որ քարաթափումի բոլոր տարածքները հաշուառուած են, սակայն կանխարգիլիչ միջոցառումներ կազմակերպել կարելի չէ: Այդ գործին համար անհրաժեշտ են ճարտարագիտական մօտեցումներ, ցանցապատում եւն.:

Վտանգաւոր ճանապարհը Վանաձոր-Ալավերտի մայրուղին է, ուր լեռներէն քարակտորներ յաճախակի ցած կը գլորուին՝ մեծ վնաս պատճառելով ինքնաշարժներուն եւ վարորդներուն, որոնք դժբախտ պատահարի զոհ կը դառնան ժամանակ առ ժամանակ:

Տարօրինակ համարուեցաւ այն փաստը, որ ձմեռուան կէսին, երբ ջերմաստիճանը զերոյէն վար է, հրդեհներ կը յառաջանան Լոռիի, Տաւուշի անտառներուն մէջ: Ոստիկանութեան յանձնարարուեցաւ զբաղիլ «ձմեռնային հրդեհներով»:

Վանաձոր

Share Button

Leave a Reply

Your email address will not be published. Required fields are marked *

Լրատուութեան գործընկեր