• London

  • Beirut

  • Moscow

  • Los Angeles

  • Paris

  • Sydney

  • Toronto

Անդրադարձ. ՀՀ Ազգային Ժողովի Արտահերթ Ընտրութիւններ

07.12.2018   01:57

ՀՀ Ազգային Ժողովի Ընտրութիւններուն Մասնակցող Քաղաքական Ուժերու Ցուցակը Գլխաւորողներու Բանավէճը Շարունակուեցաւ Աւելի Քան Երեք Ժամ

Երէկ Երեւանի առաւօտեան կանուխ ժամերուն, Հայաստանի Հանրային հեռուստաընկերութեան ուղիղ եթերով աւարտեցաւ նախընտրական մեծ բանավէճը, որ տեւեց շուրջ 3 ժամ եւ 30 վայրկեան: Ինչպէս կը հաղորդէ «Արմէնփրես»ը, բանավէճին կը մասնակցէին Դեկտեմբեր 9ի խորհրդարանական արտահերթ ընտրութիւններուն մասնակցող բոլոր քաղաքական ուժերու ցուցակները գլխաւորող գործիչները՝ Հայաստանի Հանրապետական կուսակցութենէն՝ Վիգէն Սարգսեանը, «Քաղաքացիի որոշում» սոցիալ-դեմոկրատական կուսակցութենէն՝ Սուրէն Սահակեանը, Հայ յեղափոխական դաշնակցութիւն» կուսակցութենէն՝ Արմէն Ռուստամեանը, «Իմ քայլը» կուսակցութիւններու դաշինքէն՝ Նիկոլ Փաշինեանը, «Լուսաւոր Հայաստան» կուսակցութենէն՝ Էտմոն Մարուքեանը, «Քրիստոնեա-ժողովրդական վերածնունդ» կուսակցութենէն՝ Լեւոն Շիրինեանը, «Ազգային յառաջընթաց» կուսակցութենէն՝ Լուսինէ Հարոյեանը, «Մենք» դաշինքէն՝ Արամ Սարգսեանը, «Օրինաց Երկիր» կուսակցութենէն՝  Արթուր Պաղտասարեանը, «Սասնայ ծռեր» կուսակցութենէն՝ Վարուժան Աւետիսեանը եւ «Բարգաւաճ Հայաստան» կուսակցութենէն՝ Գագիկ Ծառուկեանը:

Բանավէճի ընթացքին գործիչները խօսեցին իրենց կուսակցութիւններուն ծրագիրներուն, Արցախեան հարցի կարգաւորման, Հայաստանի տնտեսութեան, կաշառակերութեան դէմ պայքարի եւ շարք մը այլ հարցերու մասին իրենց դիրքորոշումին վերաբերեալ: Խորհրդարանական ընտրութիւններուն մասնակցող քաղաքական ուժերու ներկայացուցիչները հանդէս եկան ամփոփիչ խօսքով, ապա սեղմեցին մէկզմէկու ձեռքերը:

Պետութեան Պատճառած Վնասի Փոխհատուցման Հարց

Ընտրութիւններուն մասնակից քաղաքական ուժերը տարբեր մօտեցումներ ունին պետութեան պատճառած վնասի փոխհատուցման հարցին շուրջ, սակայն համակարծիք են, որ պաշտօնեաներու կողմէ պետութենէն գողցուած միջոցները պէտք է վերադարձուին: «Արմէնփրես»ի փոխանցմամբ՝ Առաջին ալիքի ուղիղ եթերին Դեկտեմբեր 9ին կայանալիք ԱԺ արտահերթ ընտրութիւններուն մասնակցող 11 քաղաքական ուժերու առաջին համարներու բանավէճի ընթացքին քաղաքական գործիչները այս հարցին շուրջ ներկայացուցին իրենց տեսակէտները:

«Տնտեսական յանցագործութիւններու համար պէտք է մենք կարողանանք գիծը քաշել, մարդոց ըսել՝ գողօնը պետական պիւտճէ վերադարձուցէ՛ք որոշակի գործընթացով: Եւ ատիկա պէտք է յայտնի ըլլայ, որպէսզի բոլորս տեսնենք, եւ անոր լուծումներն ալ յայտնի ըլլան, թէ գումարը ինչ եղաւ: Ինչ կը վերաբերի գործարարներուն, ապա երբ գործարարը խորհրդարան կը մտնէ, միւսները իրենք զիրենք անպաշտպան կը զգան ու իրենք ալ կը ձգտին խորհրդարան մտնել: Մենք պէտք է կարողանանք պիզնեսը եւ խորհրդարանը տարանջատել»,- ըսաւ «Լուսաւոր Հայաստան» կուսակցութեան ցուցակի առաջին համար Էտմոն Մարուքեանը:

«Այն սեփականաշնորհումներու պարագային, որոնք կատարուած են որոշակի կաշառքի դրսեւորումներու հետեւանքով, մարդը պէտք չէ ըսէ, որ անոնք պետութեան կը նուիրէ: Ինքը չի նուիրեր, ինքը իր վերցուցածը ետ կը վերադարձնէ եւ կը զղջայ անոր համար: Սա պէտք է այսպէս կատարուի»,- նշեց «Մենք» դաշինքի ցուցակի առաջին համար Արամ Սարգսեանը:

«Այս գործընթացը պէտք է դարձնենք անշրջելի: Ան ոչ թէ նուէր կու տայ, այլ բացայայտօրէն թալանած է, եւ օրէնքի ուժով բերած է ու կը վերադարձնէ»,- նկատեց ՕԵԿ ցուցակի առաջին համար Արթուր Պաղտասարեանը:

«Պէտք է օրէնքով գողցածը վերադարձնէ, բայց նաեւ պէտք է պատասխանատուութիւն ըլլայ, եւ որպէսզի ամէն առումով չափ ու սահմանը չանցնինք, պէտք է սահմանենք կարմիր ու դեղին գիծերու կանոններ: Կարմիր գիծէն վեր անոնք են, որ որոշումներ կայացնողներ եղած են եւ յանցաւոր գործակցութեան մաս կազմած են, պէտք է ենթարկուին քրէական պատասխանատուութեան ու ամբողջութեամբ ընչազրկուին: Կարմիր ու դեղին գիծերու միջեւ ինկած հատուածը պէտք է ներկայացուած համակարգով անցնի, բայց այս երկու գիծերով անցնող մարդիկ ալ պէտք է ցմահ զրկուին պետական պաշտօն զբաղեցնելու իրաւունքէն»,- ըսաւ «Սասնայ ծռեր» կուսակցութեան ցուցակի առաջին համար Վարուժան Աւետիսեանը:

«Այստեղ շատ կարեւոր հանգամանք կայ». ատիկա օրէնքը եւ թափանցիկ համակարգերն են: Այլապէս շատ մեծ վտանգներ պիտի ըլլան: Առաջին մեծ վտանգը պիտի ըլլայ, որ, այսպէս կոչուած, վերադարձուած կամ վերադարձուելիք գումարները անպայման յետոյ ետ պիտի բերուին միջազգային տարբեր դատական ատեաններով: Կաշառակերութեան դէմ գլուխ ու ձեռք կտրելով դեռ ոչ ոք յաջողութեան հասած է»,- ընդգծեց ՀՀԿ ցուցակի առաջին համար Վիգէն Սարգսեանը:

«Մեր այսօրուան օրէնսդրութեամբ՝ այն յանցագործութիւնները, որոնք կը վերաբերին հարկային չվճարումներուն, օրէնքը արդէն կը նախատեսէ, որ պետութեան նկատմամբ ունեցած հարկային պարտքը փակուեցաւ, գործը կը կարճանայ անմիջապէս: Եւ օրէնքով սահմանուած կարգով նաեւ կը վերադարձուի գոյքը»,- նշեց «Իմ քայլը» դաշինքի ցուցակի առաջին համար Նիկոլ Փաշինեան

 

Ապագայ Խորհրդարանի Կեանքի Տեւողութիւն

«Բարգաւաճ Հայաստան» կուսակցութեան նախագահ Գագիկ Ծառուկեանը անհասկնալի կը համարէ «Սասնայ ծռեր» կուսակցութեան ներկայացուցիչներու այն կանխատեսումը, որ ապագայ խորհրդարանը կարճ կեանք պիտի ունենայ: «Արմէնփրես»ի փոխանցմամբ՝ այս մասին Առաջին ալիքի ուղիղ եթերին Դեկտեմբեր 9ին կայանալիք ԱԺ արտահերթ ընտրութիւններուն մասնակցող 11 քաղաքական ուժերու առաջին համարներու բանավէճի ընթացքին «Բարգաւաճ Հայաստան» կուսակցութեան                  նախագահ Գագիկ Ծառուկեանը հարց ուղղեց  «Սասնայ ծռեր» կուսակցութեան ցուցակի առաջին համար Վարուժան Աւետիսեանին, թէ ի՞նչ նկատի ունին՝ ըսելով, որ ապագայ խորհրդարանը 1-2 տարուան կեանք ունի:

«Սասնայ ծռեր» կուսակցութեան ցուցակի առաջին համար Վարուժան Աւետիսեանը նշեց, որ իրենց քաղաքական կանխատեսմամբ՝ այս իրավիճակին մէջ բազմաթիւ խնդիրներու առկայութեամբ ձեւաւորուող խորհրդարանը կարճ կեանք պիտի ունենայ:

«Պիտի ձեւաւորուի խորհրդարան մը, որ բաւարար կարողութիւն պիտի չունենայ դիմագրաւելու մեր առջեւ ծառացած եւ տակաւին ծառացող մարտահրաւէրները, ուստի, մենք ներկայացուցած ենք երկու տարուան անցումային ծրագիր: Մենք, առհասարակ, կը պատկերացնենք դեռ այս գործընթացը` որպէս անցումային գործընթաց եւ այդ տրամաբանութեամբ կը մօտենանք հարցին:

Կեանքի առարկայական հանգամանքները պիտի բերեն եւ յանգեցնեն անոր: Մենք պէտք է անոր պատրաստ ըլլանք: Այդ պատճառով մեր ծրագիրով կ’առաջարկենք այնպիսի ծրագիրներ կատարել, որ իսկապէս պատրաստ ըլլանք անոր եւ առանց ցնցումի հանգիստ անցնինք այդ փուլով: Շատ լաւ կ’ըլլար, որ քաղաքական ուժերը ստանձնէին այդ պարտաւորութիւնը՝ նաեւ մշակելու նոր սահմանադրութիւն՝ համաժողովրդական մասնակցութեամբ, եւ անոր հիման վրայ կազմակերպելու նոր ընտրութիւններ, ի հարկէ, ընդունելով նոր ընտրական օրէնսգիրք»,- ըսաւ Աւետիսեանը:

Գագիկ Ծառուկեան հակադարձեց՝ նշելով, որ իրենք չեն որոշողը, թէ երբ կ’ըլլայ ընտրութիւնը, այլ ժողովուրդը:

«Մարդիկ կը ցանկան ներդրում ընել, իսկ գումար ունեցողը ոչ մէկ ներդրում կ’ընէ նման կանխատեսումներու պարագային»,- ըսաւ Ծառուկեանը:

«Իմ քայլը» դաշինքի ցուցակը գլխաւորող, վարչապետի պաշտօնակատար Նիկոլ Փաշինեան կարեւոր նկատեց, որ քաղաքական կայունութիւնը բերէ տնտեսական կայունութեան:

«Տնտեսական յեղափոխութիւնը հենց կարող է տեղի ունենալ քաղաքական կայունութեան պայմաններում: Ի հարկէ, եթէ լինի անհրաժեշտութիւն, միշտ էլ սահմանադրութիւնը եւ օրէնքները, ինչպէս նաեւ ժողովրդի կամքը թոյլ են տալիս արտահերթ գործընթացների , բայց կարծում եմ, որ մեր երկարատեւ տեսլականը պէտք է լինի երկրում ժողովրդավարական օրինական կայունութիւն հաստատելը, որն իր հերթին բարենպաստ պայմաններ կը ստեղծի տնտեսական յեղափոխութեան համար, եւ պէտք չէ տնտեսական եւ ներդրումային սթրեսի նախապայմաններ պատրաստել, եւ հոռետեսական կանխատեսումները այս առումով այնքան էլ տեղին չեն: Ես կարծում եմ՝ ընտրուած խորհրդարանը կաշխատի իր ամբողջ ժամանակահատուածում եւ ներդրումային բարենպաստ միջավայր կը ստեղծի»,- եզրափակեց ան:

«Մենք» դաշինքի ցուցակը գլխաւորող Արամ Սարգսեան ըսաւ, որ «Սասնայ ծռեր կուսակցութեան համար աւելի օգտակար կ’ըլլայ հիմնաւոր ծրագիրներ ներկայացնելը:

«Լուսաւոր Հայաստան» կուսակցութեան նախագահ  Էտմոն      Մարուքեանի կարծիքով՝ Հայաստանը պատմական ժամանակաշրջան կ’ապրի, եւ պէտք է այնպիսի խորհրդարան ձեւաւորել եւ այնպիսի քաղաքական համակարգ, որ նման խօսակցութիւնները ուղղակի անտեղի ըլլան:

 

Փտածութեան Դէմ Պայքար Ու Տնտեսութեան Զարգացման Տեսլական

ԱԺ արտահերթ ընտրութիւններուն մասնակցող 11 քաղաքական ուժերու ընտրական ցուցակներու առաջին համարները ներկայացուցին փտածութեան դէմ պայքարի ու տնտեսութեան զարգացման իրենց տեսլականները: «Արմէնփրես»ի փոխանցմամբ՝ այս մասին կուսակցութիւններու եւ դաշինքներու առաջնորդները խօսեցան Առաջին ալիքի եթերի ժամանակ, Դեկտեմբեր 9ին կայանալիք ԱԺ արտահերթ ընտրութիւններուն մասնակցող 11 քաղաքական ուժերու առաջին համարներու բանավէճի ընթացքին:

«Փտածութեան դէմ պայքարի մէջ ամենակարեւորը ան է, որ մենք կարողանանք մեր աշխատողներու աշխատավարձերը բարձրացնել՝ սկսած կառավարութեան անդամներէն, ուսուցիչներէն: Տնտեսութեան զարգացման համար մենք այսօր պէտք է ներդրումային ծրագիր ունենանք: Այնպէս պէտք է ընենք, որ ոչ թէ մենք խնդրենք ներդնողին ներդրում ընել, այլ մենք ընտրենք ներդրում ընել փափաքողներու մէջէն»,- ըսաւ ԲՀԿ ցուցակի առաջին համար Գագիկ Ծառուկեանը:

«Փտածութեան դէմ պայքարի համար կան սահմանուած որոշակի չափանիշներ: Եթէ խօսքը կը վերաբերի Հայաստանին, ապա մենք պէտք է նկատի ունենանք, որ փտածութիւնը եղած է կառավարման հիմնական համակարգը: Նախ պէտք է արմատախիլ ըլլայ այդ համակարգը, իսկ անոր հիմնական եւ առաջնային քայլը անցումային արդարադատութիւնն է ու յանցաւոր գործակցութեան պատասխանատուութեան կանչելը»,- նշեց «Սասնայ ծռեր» կուսակցութեան ցուցակի առաջին համար Վարուժան Աւետիսեանը:

«Փտածութեան դէմ պայքարը առանցքային նշանակութիւն ունի Հայաստանի համար: Անհրաժեշտ է ստեղծել միջազգային հետաքննչական համակարգ՝ կաշառակերութեան դէմ համակարգուած պայքար մղելու, մեղաւորներ յայտնաբերելու ու պատասխանատուութեան ենթարկելու համար: Տնտեսութեան հետ կապուած՝ 8 ամիսը բաւարար է երկրի ռազմավարական զարգացման տեսլական, ընկերա-տնտեսական ծրագիր ներկայացնելու համար, եւ մենք յոյս ունինք, որ արտահերթ ընտրութիւններէն ետք այդ ծրագիրը կ’ըլլայ»,- նկատեց «Օրինաց երկիր» կուսակցութեան ցուցակի առաջին համար Արթուր Պաղտասարեանը:

«Փտածութեան մակարդակը նուազեցնելու լաւագոյն մեթոտը հզօր տնտեսութիւն ունենալն է: Նախ տնտեսութիւնը պէտք է ուժեղանայ, աւելի շատ եկամուտներ բերէ, ու այսօրուան փտածութեան պարագային այդ ցուցանիշը տոկոսով կ’իջնէ: Երկրորդ՝ անհնարին է որեւէ ճիւղ առանձին վերցուած փորձել բարելաւել, փտածութիւնը արմատախիլ ընելու համար պէտք է համակարգուած աշխատին բոլոր կառոյցները: Մենք տարածաշրջանին մէջ լուրջ ազդեցութիւն ունեցող երկիր կրնանք դառնալ, եթէ մեր ուժերը միաւորենք այս երկիրը երկիր դարձնելու համար»,- նշեց «Մենք» դաշինքի ցուցակի առաջին համար Արամ Սարգսեանը:

«Փտածութիւնը շատ լայն հասկացութիւն է: Այդ պատճառով անոր դէմ պայքարը պէտք է ըլլայ ոչ միայն համակարգային, այլեւ պէտք է ըլլայ կանխարգիլիչ: Մենք պէտք է դիտարկենք փտածութիւնը իր ամբողջ լայն շերտով, եւ այստեղ շատ գործ ունինք ընելու: Ի հարկէ, կարելի չէ պայքարիլ փտածութեան դէմ, եթե չիրականացուի քաղաքական եւ տնտեսական մաքրագործում: Տնտեսութիւնը զարգացնելու համար մենք պէտք է վայրենի վաշխառուական համակարգի վրայ վերահսկողութիւն սահմանենք, որովհետեւ դրամատուները ֆինանսը վերցուցած են իրենց ձեռքը, եւ զայն կ’օգտագործեն զուտ գերշահոյթ ստանալու համար»,- ըսաւ «Ազգային յառաջընթաց» կուսակցութեան ցուցակի առաջին համար Լուսինէ Հարոյեանը:

«Օրէնսդրութեան պարզութիւն պէտք է: ՀՀ օրէնսդրութիւնը նման ոլորտներու մէջ կը նպաստէ փտածութեան: Պատիժի անխուսափելիութեան համակարգը պէտք է աշխատի 100 տոկոսով: Արժեհամակարգը պէտք է վերադառնայ ու ազգային լաւագոյն աւանդոյթները պէտք է վերադառնան, այս բոլորի համախումբը կու տայ այն արդիւնքը, որ կ’ուզենք»,- նշեց «Քրիստոնեաժողովրդական վերածնունդ» կուսակցութեան ցուցակի առաջին համար Լեւոն Շիրինեանը:

«Փտածութեան դէմ պայքարի համար մեզի պէտք է առողջ քաղաքական համակարգ: Մենք 7րդ գումարման խորհրդարանի մէջ պիտի զբաղինք հակափտածութեան համաշխարհային մարմինի ստեղծման լոպպինկ ընելով, եւ այնպիսի շահերու բախումի օրէնսդրութիւն մշակելով, որպէսզի անոնք որոնք յստակ շահերու բախումի մէջ են, չըլլան խորհրդարանին մէջ: Տնտեսական զարգացման համար մենք այնպիսի օրէնսդրութիւն պիտի մշակենք, որ գիւղացին պաշտպանուած ըլլայ»,- ըսաւ «Լուսաւոր Հայաստան» կուսակցութեան ցուցակի առաջին համար Էտմոն Մարուքեանը:

«Հայաստանէն համակարգային փտածութիւնը արմատախիլ եղած է, եւ այսօր փտածութեան դէմ պայքարի մէջ աննախադէպ գործընթաց կ’ընթանայ: Փտածութեան դէմ հետագայ պայքարի համար առաջին հերթին հարկաւոր է քաղաքական կամք, եւ անհրաժեշտ է ստեղծել համակարգեր, որպէսզի հակափտածութեան համաշխարհային առանձին մարմին գոյութիւն ունենայ: Ինչ կը վերաբերի տնտեսութեան, առաջինը 10 ամսուան տուեալներով Հայաստանի մէջ կայ 6.6% տնտեսական աճ, արտահանումը աճած է 11%ով: Զբօսաշրջութիւնը աճած է 8.8%ով, գիւղական մթերքի արտահանումը աճած է 61%ով, գիւղատնտեսական մթերքի արտահանումը աճած է 8%ով, եւ դեռ պէտք է շարունակէ աճիլ»,- նշեց «Իմ քայլը» դաշինքի ցուցակի առաջին համար Նիկոլ Փաշինեան:

«Եթէ մենք կ’ուզենք իրական փտածութեան դէմ պայքար տանիլ, պէտք է հասկնանք, որ այդ չի կրնար կատարել կառավարութիւնը, այլ պէտք է կատարուի անկախ մարմինի կողմէ: Տնտեսութեան վերաբերեալ՝ տնտեսական մեր կարգը ընկերա-շուկայական տնտեսութիւնն է՝ սահմանադրութեամբ: Սա պէտք է կեանքի կոչել»,- ըսաւ ՀՅԴ ցուցակի առաջին համար Արմէն Ռուստամեանը:

«Փտածութիւնը ընկերային երեւոյթ է, եւ նոյնիսկ ամենախիստ ուժային մեթոտներով կարելի չէ զայն արմատախիլ ընել: Տնտեսութեան վերաբերեալ՝ հանրային կառավարման համակարգը կը հանդիսանայ միջավայր ձեւաւորող ազդեցիկ գործօն, այս կապակցութեամբ մենք հանրային կառավարման համակարգի ուղղութիւններու վերաբերեալ գործունէութիւն կը ծաւալենք»,- ըսաւ «Քաղաքացիի որոշում» կուսակցութեան ցուցակի առաջին համար Սուրէն Սահակեանը:

«Փտածութեան դէմ պայքարը պէտք է համակարգուած ընել: Եթէ ընենք այնպէս, ինչպէս կ’ընենք, Հայաստանի մէջ ներդրումները զերոյի կը մօտենան: Այն օրէնսդրութիւնը, որ կայ հիմա լաւ հնարաւորութիւններ կու տայ, յուսամ՝ անիկա ճիշդ կ’օգտագործուի»,- նշեց ՀՀԿ ցուցակի առաջին համար Վիգէն Սարգսեանը:

 

ԼՂ Հիմնախնդիրը

ՀՀ Ազգային ժողովի արտահերթ ընտրութիւններուն մասնակցող բոլոր քաղաքական ուժերը վստահ են՝ Լեռնային Ղարաբաղի հակամարտութեան կարգաւորման հարցը երկրի կարեւոր առաջնահերթութիւններէն է: Ինչպէս կը հաղորդէ «Արմէնփրես»ը, այս մասին Հանրային հեռուստաընկերութեան ուղիղ եթերին նախընտրական մեծ բանավէճի ժամանակ նշեցին ընտրապայքարի մէջ ներգրաւուած ուժերու ցուցակները գլխաւորող քաղաքական գործիչները՝ ներկայացնելով ղարաբաղեան խնդիրի կարգաւորման իրենց տեսլականը:

Հայաստանի Հանրապետական կուսակցութեան ներկայացուցիչ Վիգէն Սարգսեան համոզում յայտնեց, որ պէտք է շարունակել զինուած ուժերու արդիականացումը: Իր համոզմամբ՝ ՀԱՊԿ գլխաւոր քարտուղարի պաշտօնի կորուստը մեծ սխալ եղած է: «Ունինք խնդիր մեր դաշնակիցներուն հետ ճիշդ յարաբերութիւններ կառուցելու եւ գործընկերներուն բացատրելու, թէ ուր են այն կարմիր գիծերը, ուրկէ չենք կրնար անցնիլ»,- ըսաւ ՀՀԿ ներկայացուցիչը:

Անդրադառնալով ՀԱՊԿ գլխաւոր քարտուղարի հարցին՝ «Իմ քայլը» կուսակցութիւններու դաշինքի ցուցակը գլխաւորող, վարչապետի պաշտօնակատար Նիկոլ Փաշինեան նշեց. «Հայաստանի Հանրապետութիւնը երկար ժամանակ կեղծ նուաճումներով են տարել: Նուաստացուցիչ երեւոյթ է, երբ ՀԱՊԿ գլխաւոր քարտուղարի հովանու ներքոյ կառոյցի երկրները Հայաստանի կառավարութեան լռութեան պայմաններում զինում են Ադրբեջանին: Մենք չենք պատրաստուում լուռ եւ հնազանդ դիտորդի կարգավիճակով տեսնել, թէ ինչպէս են ոմանք աշխատում մեր պետական եւ ազգային շահերի դէմ»: Խօսելով ԼՂ հիմնախնդիրի կարգաւորման մասին՝ Փաշինեան յայտարարեց, որ Արցախի Հանրապետութիւնը պէտք է ըլլայ բանակցային կողմ եւ առանց Արցախի Հանրապետութեան լիարժէք ներգրաւուածութեան կարելի չէ խօսիլ հարցի կարգաւորման որեւէ լուծման մասին: «Արցախի հարցի լուծողը ժողովուրդն է՝ Հայաստանի ու Արցախի ժողովուրդը»,- յայտարարեց ան:

«Քաղաքացիի որոշում» սոցիալդեմոկրատական կուսակցութեան ներկայացուցիչ Սուրէն Սահակեանը համոզում յայտնեց, որ պէտք է յստակեցնել, թէ ի՛նչ է Արցախը մեզի համար՝ հայկական երկրորդ պետութի՞ւն, թէ Հայաստանի անբաժանելի մաս:

ՀՅԴ առաջին համարը՝ Արմէն Ռուստամեան ընդգծեց, որ իր քաղաքական ուժի համար Լեռնային Ղարաբաղի հարցը ազգային գերխնդիր է:

«Լուսաւոր Հայաստան» կուսակցութեան ցուցակը գլխաւորող Էտմոն Մարուքեանը նշեց, որ Հայաստանի եւ Արցախի սահմաններու անվտանգութեան համար շատ կարեւոր է հզօր տնտեսութիւն ունենալը: «Թոյլ բանակ ու տնտեսութիւն ունեցող Հայաստանը չի կրնար ունենալ խնդրի հայանպաստ լուծում: Պէտք է ամէն ինչ ընենք, որ 18-19 տարեկան մեր զինուորները դուրս բերուին առաջնագիծէն: Պէտք է առաջնագիծը այնպէս հսկուի, որ մարդկային ուժը շատ հեռու ըլլայ թշնամիի նշանառուներէն, ամէն ինչ ընենք, որ վարպետ գումարտակներով համալրենք մեր բանակի սահմանային ուղղութիւնները»,- ըսաւ ան:

Բանակը վարպետ զինծառայողներով համալրելու անհրաժեշտութեան մասին խօսեցաւ նաեւ «Բարգաւաճ Հայաստան» կուսակցութեան առաջնորդ Գագիկ Ծառուկեանը. «Պէտք է զարգացնենք ռազմաարդիւնաբերութիւնը: 18 տարեկան երիտասարդները պէտք չէ կանգնին սահմանին, պէտք է ըլլան պայմանագրային, փորձառու ծառայողներ: Պէտք է տնտեսութիւնը զարգացնենք, հզօր ու ուժեղ պետութիւն ունենանք, որպէսզի կարենանք կարգաւորել մեր խնդիրները»:  

«Ազգային յառաջընթաց» կուսակցութեան առաջին համարը՝ Լուսինէ Հարոյեանը, կարեւորեց սահմանային գիծին նորագոյն սարքի տեղադրումը: «Սա նուազագոյնի կրնայ հասցնել զոհերու թիւը: Բացի այդ՝ պէտք է հզօրացնենք Արցախը, վերաբնակեցնենք զայն»,- ըսաւ Հարոյեանը:

«Քրիստոնեաժողովրդական վերածնունդ» կուսակցութեան առաջին համարը՝ Լեւոն Շիրինեանը, անհրաժեշտ համարեց ԼՂ խնդրի շուրջ բանակցային գործընթացը շարունակելու հետ միասին փոխել ձեւաչափը: «Մենք մեր մտածողութեան մէջ փոփոխութեան պահպանողականութիւն ունինք: Նոր մօտեցումներ, առաջարկներ շատ քիչ կ’ըլլան»,- ըսաւ ան՝ նշելով, թէ Արցախի հարցը պէտք է տեղափոխել 1960 թուականի Դեկտեմբեր 24ի գաղութացուած ժողովուրդներուն ու պետութիւններուն անկախութիւն տալու վերաբերեալ ՄԱԿի Ընդհանուր ժողովի յատուկ որոշումին:

«Մենք» դաշինքի ցուցակը գլխաւորող Արամ Սարգսեան արցախեան խնդրի կարգաւորման հարցին մէջ իր վստահութիւնը յայտնեց գործող իշխանութեան:

«Օրինաց Երկիր» կուսակցութեան ղեկավար Արթուր Պաղտասարեանը համոզում յայտնեց, որ ԼՂ հիմնախնդիրը կրնայ լուծել հայ ժողովուրդը հաւաքական հանրաքուէի միջոցով: Իր գնահատմամբ՝ այլ համակարգեր գոյութիւն չունին: «Մենք հանդէս կու գանք մեր զինուած ուժերու մարտունակութեան հետեւողական բարձրացման ու զարգացման, բանակցային գործընթացին մէջ ԼՂ աշխոյժ ներգրաւուածութեան, ԵԱՀԿ Մինսքի խումբի ձեւաչափը պաշտպանելու օգտին»,- ըսաւ Պաղտասարեանը՝ կարեւորելով նաեւ հայ-ռուսական յարաբերութիւններու հետեւողական զարգացումը:

Իսկ «Սասնա ծռեր» կուսակցութեան ցուցակի առաջին համար Վարուժան Աւետիսեանը յայտարարեց, որ խնդիրը պէտք է լուծել միայն Արցախը Հայաստանի մէջ որպէս մարզ ներառելու միջոցով: «Չկայ Արցախի ժողովուրդ, կայ հայ ազգ, մէկ միասնական ազգ»,- յայտարարեց ան:

Հայաստանի Դրամատնային Համակարգը

Ազգային ժողովի արտահերթ ընտրութիւններուն մասնակցող քաղաքական ուժերը ներկայացուցին դրամատնային համակարգի բարեփոխումներու իրենց ծրագիրները:  «Արմէնփրես»ի փոխանցմամբ՝ Առաջին ալիքի ուղիղ եթերին Դեկտեմբեր 9ին կայանալիք ԱԺ արտահերթ ընտրութիւններուն մասնակցող 11 քաղաքական ուժերու առաջին համարներու բանավէճի ընթացքին «Օրինաց երկիր» կուսակցութեան նախագահ Արթուր Պաղտասարեանը բոլոր քաղաքական գործիչներէն հետաքրքրուեցաւ, թէ ինչպիսի՛ քայլերու պէտք է ձեռնարկուին դրամատնային համակարգը բարեփոխելու ուղղութեամբ:

«Ազգային յառաջընթաց» կուսակցութեան ցուցակը գլխաւորող Լուսինէ Հարոյեանը նշեց, որ իրենց կազմը կը կարեւորէ տնտեսութիւնը վաշխառուական համակարգի ճիրաններէն ազատելը:

«Պատահական չէ, որ Հայաստանի նման փոքրիկ երկրի մէջ կայ աւելի քան 20 դրամատուն, ալ չեմ ըսեր՝ ինչքան վարկային կազմակերպութիւններ, գրաւատուներ, եւ անոնք օրէ-օր սունկի պէս կ’աճին: Սա կը նշանակէ, որ տնտեսութեան արիւնը՝ ֆինանսը, որ պէտք է ծառայէր նաեւ տնտեսական կարիքներուն, խորքին մէջ կը ծառայէ մի քանի անձանց գերշահոյթ բերելու գործին: Մինչեւ մենք այս խնդիրը չլուծենք, ոչ մէկ յառաջընթաց պիտի ունենանք տնտեսութեան մէջ:

Քանի որ մենք ընկերային ուղղուածութեան կուսակցութիւն ենք, ապա այն կարծիքին ենք, որ պետութիւնը պատասխանատուութիւն կը կրէ իր քաղաքացիներուն ընկերային ապահովութեան համար: Պետութիւնը պէտք է օրէնսդրական լծակներով ստիպէ դրամատուները ունենալու յատուկ վարկատեսակներ»,- ըսաւ Հարոյեանը:

«Քրիստոնեաժողովրդական վերածնունդ» կուսակցութեան առաջին համար  Լեւոն Շիրինեանի կարծիքով՝ դրամատուները պէտք է խթանեն արտադրութեան զարգացումը:

«Դրամատուները պէտք է խթանեն արտադրութեան զարգացումը: Մեր դրամատուները արտադրութիւն չեն զարգացներ: Անոնց նպատակամղուածութիւնը բոլորովին այլ է: Դրամատուները պէտք է նպաստեն արդիւնաբերութեան վերականգնումին: Հարցուցէ՛ք ձեռնարկատէրերուն, տեսէ՛ք՝ ի՛նչ վիճակ է. դրամատունը ոչ միայն զարգացում չի ապահովեր, այլեւ կը խանգարէ զարգացումը»,- ըսաւ Շիրինեանը:

«Լուսաւոր Հայաստան» կուսակցութեան ցուցակը գլխաւորող   Էտմոն Մարուքեանը դիտել կու տայ, որ Հայաստանի մէջ դրամատնային կայուն համակարգ է:

«Հայաստանի մէջ շատ հանրայայտ դարձած է դրամատնային համակարգին հարուածելը, որովհետեւ ատիկա ժողովուրդի սրտէն կը բխի, բայց Հայաստանի մէջ դրամատնային կայուն համակարգ է, եւ այսօրուան դրամատնային համակարգի շնորհիւ է, որ տոլար-դրամ տատանում չունինք: Պէտք է ամէն ինչ ընենք, որ կայուն երկիր ունենանք, աժան դրամը բերենք Հայաստան, մարդոց աժան վարկեր տան: Մարդիկ ինչո՞ւ դժգոհ են դրամատնային համակարգէն. վարկը շատ թանկ է, որովհետեւ վտանգները շատ մեծ են»,- ըսաւ Մարուքեանը:

«Իմ քայլը» դաշինքի ցուցակը գլխաւորող, վարչապետի պաշտօնակատար Նիկոլ Փաշինեան յիշեցուց, որ իր կառավարութեան օրօք  125 հազար մարդ արդէն իսկ «սեւ ցուցակներէն» դուրս եկած է:

«125 հազար մարդու վարկային պատմութիւնը մաքրուել է, եւ սրան ուզում եմ աւելացնեմ նաեւ այն 150 հազար քաղաքացիներին, ովքեր երթեւեկութեան կանոնների տուգանքների համար 13 միլիարդ դրամի տակ էին, եւ նրանց հաշիւների մասնակի կալանք էր դրուած, եւ դրա պատճառով ԴԱՀԿի սեւ ցուցակներում էին, այդ մարդիկ նոյնպէս սեւ ցուցակներից դուրս են եկել: Այսօր կայ շատ յստակ գործընթաց, որ բանկային համակարգը ֆինանսաւորում է հենց արդիւնաբերութիւնը: Այսօր բացուած կենցաղային տեխնիկայի գործարանը ստեղծուել է ամբողջութեամբ  Հայաստանի բանկային համակարգի վարկերի միջոցով»,- ըսաւ Փաշինեան:

ՀՅԴ առաջին համարը՝ Արմէն Ռուստամեանը ընդգծեց՝ դրամատուները պարտաւոր են սպասարկելու քաղաքացիները պատշաճօրէն:

ՀՀԿի ցուցակի առաջին համար Վիգէն Սարգսեանը նշեց, որ վերջին տարիներուն 31 անգամ աւելցած են դրամատուներու ներգրաւուած աւանդները եւ 25 անգամ՝ վարկերը:

«Վարկային միջոցները այս տարիներուն ընթացքին անընդհատ աժանացած են՝ հասնելով 5 տոկոսի՝ աւանդներու, եւ 10 տոկոսի՝ տոլարային վարկերու պարագային: Սա շատ մեծ նուաճում է, իսկ դրամատուները լռութիւն կը սիրեն: Ի հարկէ, Վրաստանի օրինակը գայթակղիչ է, բայց պէտք է ընել այնպէս, որ դրամատուները չվախնան»,- ըսաւ Սարգսեանը:

«Մենք» դաշինքի ցուցակը գլխաւորող Արամ Սարգսեանը նշեց, որ հարցը Կեդրոնական դրամատան եւ առեւտրային դրամատուներու յարաբերութիւններու դաշտի տիրոյթին մէջ է, եւ այդ մէկը քննարկումի առակայ պիտի չդարձնէ:

ԲՀԿի նախագահ Գագիկ Ծառուկեանի խօսքով՝ դրամատուներու սեփականատէրերը պէտք է վստահութիւն ունենան, որպէսզի կարենան աժան գումարներ բերել երկիր եւ վարկեր տրամադրել գիւղատնտեսութեան, փոքր եւ միջին պիզնեսի ու երիտասարդ ընտանիքներուն համար:

Արթուր Պաղտասարեանը ըսաւ, որ Հայաստանի դրամատնային համակարգը կայացած է եւ կը նպաստէ Հայաստանի տնտեսութեան զարգացման, սակայն խօսքը այն մարտահրաւէրի մասին է, որուն առջեւ յայտնուած է հայ ժողովուրդը:

«1.5 միլիոն մարդ դրամատուներու, վարկային կազմակերպութիւններու, գրաւատուներու գերի ինկած են: Այստեղ անհրաժեշտութիւն կայ պետական համակարգուած ծրագրի մշակման եւ իրականացման»,- ըսաւ Պաղտասարեանը:

Նիկոլ Փաշինեան Թուարկեց Հայաստանի Մէջ Վերջին 6-7 Ամսուան Ընթացքին Տեղի Ունեցած Կարեւոր Փոփոխութիւնները

Հանրային հեռուստաընկերութեան ուղիղ եթերի ժամանակ նախընտրական մեծ բանավէճի ընթացքին «Իմ քայլը» դաշինքի նախընտրական ցուցակի առաջին համար, վարչապետի պաշտօնակատար Նիկոլ Փաշինեան ներկայացուց Հայաստանի մէջ տեղի ունեցած այն կարեւոր փոփոխութիւններն ու որոշումները, որ տեղի ունեցած են վերջին 6-7 ամսուան ընթացքին:

Ինչպէս կը հաղորդէ «Արմէնփրես»ը, Փաշինեան ըսաւ. «Նախ, 20 եւ 10 դրամով համապատասխանաբար էժանացել են կազն ու լոյսը սոցիալական անապահով որոշակի խմբերի համար: Ի հեճուկս նախորդ կառավարութեան ստորագրած պայմանագրի՝ խմելու ջուրը չի թանկացել եւ մինչեւ 2024 թուականը չի թանկանայ:

209 հազար մարդու աշխատավարձ բարձրացել է Յուլիս 1ից, եւս 200 հազարի աշխատավարձը կը բարձրանայ 2019 թուականի ընթացքում»:

«Իմ քայլը» դաշինքի ցուցակի առաջին համարը յայտնեց, որ 85 հազար մարդու թոշակներն ու նպաստները կ’աւելնան Յունուար 1էն: «Յայտնի 1000 դրամների ֆոնտը, որը հայրենիքի պաշտպանների համար էր, 2 տարով իր ազդեցութեամբ յետ է գնացել եւ տարածուում է ոչ թէ 2017 թուականի Յունուարի 1էն յետոյ տեղի ունեցած, այլ 2016 թուականի դէպքերի վրայ:

Բնակարան երիտասարդ ընտանիքներին ծրագրով հիփոթեքային վարկի տոկոսներն իջել են աննախադէպ ցածր մակարդակի՝ մինչեւ 5 տոկոս, իսկ նորակառոյց բնակարանների պարագայում, ըստ էութեան, անտոկոս վարկեր են տրուում»,- նշեց ան:

Փաշինեան յայտնեց, որ բարձրացած են անշարժ գոյքի գիներն ու գործարքները: «125 հազար մարդու վարկային պատմութիւն մաքրուել է, նրանք երաշխաւորներ են եւ վարկառուներ: Երկրորդ երեխայի միանուագ նպաստը եռապատկուել է: 38 հազարով աւելացել է գրանցուած աշխատողների թիւը: Վերացել են տնտեսական մենաշնորհները:

Քրէակատարողական հիմնարկների գերբեռնուածութեան խնդիրը լուծուել է, երթեւեկութեան կանոնների տուգանքների համաներում է եղել, 150 հազար մարդուն ներուել է 130 մլրդ դրամ տուգանք»,- ըսած է Փաշինեան՝ յայտարարելով, որ ուղիղ եթերի ժամանակ բանավէճի փաստը արդէն աննախադէպ է Հայաստանի երրորդ Հանրապետութեան պատմութեան մէջ:

Այս Ընտրութիւններէն Կախուած Պիտի Ըլլայ Մեր Երկրի Ապագան Յառաջիկայ 5 Տարիներուն Եւ Անդին. Վիգէն Սարգսեան

«Այս Կիրակի մենք պիտի կատարենք ընտրութիւն, որմէ կախուած պիտի ըլլայ մեր երկրի ապագան յառաջիկայ 5 տարիներուն եւ անդին: Ինչպէս կը հաղորդէ «Արմէնփրես»ը, այս մասին Հանրային հեռուստաընկերութեան ուղիղ եթերի ժամանակ նախընտրական մեծ բանավէճի ընթացքին ըսաւ Հայաստանի Հանրապետական կուսակցութեան նախընտրական ցուցակի առաջին համար Վիգէն Սարգսեանը:

«Հասարակութիւնը սեւերու եւ սպիտակներու բաժնելու իշխանութեան քաղաքականութիւնը ոչ այլ ինչ է, քան ներքին թշնամիներ որոնելու եւ ստեղծելու, այլակարծութիւնը խեղդելու միջոց»,- ըսաւ ան:

Սարգսեան նշեց, թէ Փաշինեան ժողովուրդի ընտրութեան կը ներկայանայ ոչ թէ քաղաքական կազմով, այլ անձնական նուիրուածութեան սկզբունքով ձեւաւորուած ցուցակով:

«Մեր երկրին մէջ առկայ բազմակարծութեան, մամուլի ազատութեան մթնոլորտը թունաւորուած է ու աւելի կը սեղմուի, եթէ չկանխենք զայն: Դատարաններու եւ արդարադատութեան անկախութիւնը վտանգի տակ է եւ իսպառ կը վերացուի, եթէ Դեկտեմբեր 9ին չկանխենք զայն: Տնտեսութիւնը կը գահավիժէ եւ անպայման կը յայտնուինք ճգնաժամի մէջ, եթէ չկանխենք զայն:

Դեկտեմբեր 9ը հին ու նոր իշխանութեան միջեւ ընտրութիւն կատարելու օր չէ, Դեկտեմբեր 9ը իւրաքանչիւրիս քուէով որոշելու օր է՝ Հայաստանը պիտի վերածուի միանձնեայ բռնապետութեան, թէ կ’անցնի բարդ, բայց հաւասարակշռուած հակակշիռներու համակարգին»,- եզրափակեց խօսքը ՀՀԿ ցուցակի առաջին համարը:

Share Button

Մեկնաբանել

Լրատուութեան գործընկեր