• London

  • Beirut

  • Moscow

  • Los Angeles

  • Paris

  • Sydney

  • Toronto

Աշխարհի տարօրինակութիւններէն

08.11.2018   23:32

ԳԷՈՐԳ ՔԷՕՇԿԷՐԵԱՆ

Ռիօ Տը Ժանէյրօ, Պրազիլ.

Ընտանիքի կազմութեան հոր հասկացողութիւն…

ՆՈՐ ՕՐ, ԼՈՍ ԱՆՃԵԼԸՍ. – Նախկին ֆութպոլի աստղ Ռոնալտինիօ (տեսնել նկարը) պիտի ամուսնանայ յառաջիկայ Օգոստոս ամսուան մէջ։ Մինչեւ հոս արտակարգ ոչ մէկ դէպք, սակայն եկուր տես որ ան երկու աղջկայ հետ միեւնոյն ժամանակ՝ պիտի կնքէ այդ պսակադրութիւնը…

Ռօնալտինիօ 2013-ին ծանօթացած է Քօէլհոյի (Coelho) հետ եւ 2016-ին՝ Սաուզայի (Souza) հետ եւ 2017-ի Դեկտեմբեր ամսուընէ սկսեալ, անոնք շատ համերաշխ արդէն կ՚ապրին միասին։

Ուստի, երբ Ռոնալտինիօ հանգստեան կը կոչուի 2018-ի Յունուար ամսուն վերջաւորութեան, անմիջապէս ամուսնութիւն կ՚առաջարկէ վերոյիշեալ իր երկու ընկերուհիներուն՝ նշանտուքի մատանի անցընելով անոնց աջ միջնամատերուն վրայ։

Թէեւ երկու կնկայ հետ՝ առանձին-առանձին ամուսնանալը ապօրինի է Պրազիլիոյ մէջ, սակայն երբ պսակադրութիւնը կը կատարուի միեւնոյն ժամանակ՝ այդ պարագային արտօնուած է, հետեւեալ բացատրութեամբ։ Սա կը նկատուի պարզ քաղաքային միութիւն մը՝ այսինքն կենակցութիւն երեք անձերու միջեւ (a three-person civil union), որը արտօնուած է Պրազիլոյ մէջ։

Ես՝ այս դրութիւնը պիտի որակէի «նրբացուցիչ դէպք յանցանաց», ճիշդ չե՞մ։ Տարբեր ժամանակ կամ միեւնոյն ժամանակ ամուսնանալը՝ ի՞նչ կը փոխէ կացութենէն, չեմ հասկնար… Ան հիմա երկու կին ունի եւ վերջ։

Առ ի հետաքրքրութիւն ըսեմ, որ 2012-ին, նմանօրինակ կենակցութիւն մը՝ երկու կնկայ եւ մէկ մարդու միջեւ, տեղի ունեցած եւ արտօնուած է Պրազիլիոյ մէջ։ Իսկ 2015-ին ալ՝ նմանօրինակ կենակցութիւն մը՝ երեք կիներու միջեւ, դարձեալ տեղի ունեցած եւ արտօնուած է։ Այդ կիներու արտօնութիւնը շնորհուած է այն հիման վրայ, որ անոնք միասնաբար զաւակ մը պիտի որդեգրեն եւ մեծցնեն։ Որո՞ւ վրայ կը խնդան ասոնք, չեմ հասկնար…

 

Սիրաքոյզ, Նիւ Եորք

Զաւակի մը ոդիսականը…

Մայքըլ Ռոթոնտօ (տեսնել նկարը) 30 տարեկան է, անգործ, եւ կը բնակի իր ծնողքին տան գետնայարկը (basement)։ Ան ամուսնալուծուած է եւ ունի 8 տարեկան մանչ զաւակ մը։

Ամերիկայի մէջ՝ կար ժամանակ, երբ զաւակը 18 տարիքը թեւակոխելէ ետք, պէտք էր հեռանար իր ծնողաց տունէն։ Իսկ հիմա կացութիւնը բոլորովին փոխուած է։ Զաւակներ՝ համալսարանական ուսումը ստանալէ եւ գործի սկսելէ ետք, կը վերադառնան իրենց հօրենական տունը՝ որովհետեւ առանձին ապրիլը սուղ է։ Առաւել՝ անոնք պէտք է նախ իրենց ուսման համար փոխ առած գումարը (loan) վերադարձնեն…

Վերադառնալով Մայքըլին, ծնողքը կը պահանջէ որ ան տունէն հեռանայ։ Բայց Մայքըլ՝ առարկելով որ անգործ է, չ՚անսար ծնողաց պահանջքին։ Եւ ահա կը ծագի վէճ, վիճաբանութիւն եւ արդիւնքը կ՚ըլլայ՝ հաւատաք կամ ոչ, դիմել դատարան։

Եւ ի՞նչ կը խորհիք, որ դատաւորը վճռէ։ Ան կը վճռէ ի նպաստ Մայքըլի ծնողաց եւ կը պահանջէ, որ Մայքըլը շուտով հեռանայ իր բնակած գետնայարկէն։ Մայքըլ կը խնդրէ որ գոնէ վեց ամիս ժամանակ տան իրեն, որ կարողանայ յարմար տուն մը գտնել եւ պարպել գետնայարկը։

Կրնա՞ք երեւակայել, որ ծնողք մը դատարան դիմէ, զաւակը տունէն հեռացնելու համար։ Ես կը կարծեմ որ ոեւէ հայ ծնողք չի կրնար նման քայլ մը առնել իր զաւակին նկատմամբ։ Օրինակ վերցնենք իմ ընտանիքէս. երկու զաւակներս 30-ը անց են, կ՚աշխատին եւ մեզի հետ կ՚ապրին։ Մի՞թէ պէտք է վռնտեմ զիրենք, քաւ լիցի…

Սակայն հոս Ամերիկա է եւ ամէն ինչ կրնայ պատահիլ, գէթ՝ ամերիկեան ընտանիքներէն ներս։ Հազա՜ր ափսոս…

Share Button

Մեկնաբանել

Լրատուութեան գործընկեր