• London

  • Beirut

  • Moscow

  • Los Angeles

  • Paris

  • Sydney

  • Toronto

Արցախը Նախորդ Շաբաթ

16.04.2018   19:06

*ՆՈՐԱՅՐ ՅՈՎՍԷՓԵԱՆ*
«Զարթօնք»ի Արցախի Աշխատակից

Հիշեցումներ՝ Քաղաքական Դաշտին, Կրակոցներ՝ Առաջնագիծին Վրայ

Ապրիլ ամսուան առաջին տասնօրեակին ազրպէյճանա-ղարաբաղեան հակամարտութեան կարգաւորման թեման դարձեալ քննարկման ենթարկուեցաւ. մէկ կողմէն՝ նորէն յայտարարութիւններ հնչեցին՝ հարցի խաղաղ կարգաւորման անհրաժեշտութեան մասին, միւս կողմէն՝ առաջնագիծին վրայ զարգացումներ գրանցուեցան, որոնք վերահաստատեցին, որ լարման հաւանականութիւնը չէ նուազած: Չնայած, յանուն արդարութեան պէտք է ըսել, որ նոյնիսկ չէ ալ աճած:

Ռուսաստանի արտաքին գործոց նախարարութեան կայքին մէջ տեղադրուած են Սերկէյ Լաւրովի պատասխանները հայկական լրատուամիջոցներուն: Ռուսաստանի արտաքին գործոց նախարարը խօսած է հայ-ռուսական յարաբերութիւններուն մասին՝ վերջին տարիներու կտրուածքով: Բնականաբար, այդ յարաբերութեան անկիւնաքարերէն մէկը անվտանգութեան խնդիրներու ամբողջութիւնն է՝ սերտօրէն կապուած ազրպէյճանա-ղարաբաղեան հակամարտութեան հետ: «Ղարաբաղեան հակամարտութեան կարգաւորումը յետխորհրդային տարածքին վրայ մեր առաջնահերթութիւններէն մէկն է: Ռուսաստանը Միացեալ Նահանգներուն եւ Ֆրանսային հետ կը կազմէ ԵԱՀԿ ՄԽ համանախագահներու եռեակը: Այդ դերին մէջ մենք ձեռք կ’առնենք ինչպէս միասնական ջանքեր, այնպէս ալ միեւնոյն  տրամաբանութեամբ շրջանակներէն ներս հանդէս կու գանք անհատական նախաձեռնութիւններով՝ հաշուի առնելով մեր յատուկ կապերը Հայաստանի եւ Ազրպէյճանի հետ»,- ընդգծած է Ռուսաստանի արտաքին գործոց նախարարը: Սերկէյ Լաւրովը քազանեան հանդիպումը կը յիշէ: Այդ մէկը երկարատեւ աշխատանքի արդիւնք որակած է ու յիշել տուած է, որ կը թուէր, թէ կողմերը համաձայնութեան մօտ էին: «Աշխատանքը, որ տարուած է 2009-2011 թուականներուն, իսկապէս բաւական աշխոյժ էր: Ռուսաստանի, Հայաստանի եւ Ազրպէյճանի նախագահները այդ ընթացքին մօտ 10 անգամ հանդիպած են: Հերթական հանդիպումը, որ նախատեսուած էր Քազանի մէջ, իրապէս թոյլ կու տար ակնկալելու դրական արդիւնքներ, քանի որ փաստաթուղթերու նախագիծերուն մէջ, զորս ռուսական կողմը պատրաստած էր ամերիկացի եւ ֆրանսացի համանախագահներու աջակցութեամբ, հաշուի առնուած էին, ինչպէս մենք կը կարծէինք, Հայաստանը եւ Ազրպէյճանը յուզող բոլոր հարցերը՝ հաւասարակշռուած տեսքով: Բայց բուն գագաթաժողովի ընթացքին ի յայտ եկան նոր հարցեր եւ մեկնաբանութիւններ»,- քազանեան հանդիպման ընթացքին արձանագրուած դժուարութիւններուն մասին խօսած է Սերկէյ Լաւրովը՝ առանց մանրամասնութեանց երթալու: Ռուսաստանի արտաքին գործոց նախարարը ընդգծած է, որ քազանեան փաստաթուղթը դեռ ամբողջապէս կորսուած չէ: Աշխատանքը, որ տարուած է, հարցերը, որոնք պայմանաւորուած են, կրնան օգտակար ըլլալ բանակցային հետագայ գործընթացի համար. «Համոզուած եմ, որ շատ բաներ, որոնք ընդգրկուած են քազանեան փաստաթուղթին մէջ, այսօր ալ պահանջուած են. բան մը, որ կը հաստատէ նաեւ Երեւանի եւ Պաքուի վերաբերմունքով այդ ժամանակներէն ի վեր նախագահներու, նախարարներու մակարդակով կայացած հանդիպումներուն ընթացքին, ինչպէս նաեւ համանախագահներու վերաբերմունքով, որոնք պարբերաբար կ’այցելեն տարածաշրջան՝ Երեւան, Պաքու, Ստեփանակերտ»: Քազանեան փաստաթուղթի մասին յիշեցումը ազրպէյճանական մամուլին մէջ որոշ աշխուժութիւն ապահոված է, սակայն միաժամանակ Սերկէյ Լաւրովը չի թաքցներ, որ նոր զարգացումները արդէն իսկ չեն կրնար տեղաւորուիլ քազանեան տրամաբանութեան մէջ: Համանախագահները իրենց առաջարկներուն մէջ հաշուի կ’առնեն նոր զարգացումները: «Այս ընթացքին ծնունդ առին մի քանի նոր մտքեր, զորս ներկայիս համանախագահները առաջ կը մղեն կողմերու հետ հանդիպումներու ժամանակ: Ամենակարեւորը՝ անվստահութիւնը յաղթահարելն է, ինչը անցեալին պէս մերթ ընդ մերթ կ’երեւի բանակցային գործընթացի ատեն: Բացի այդ, կայ նաեւ արդիւնաւէտ առաջարկներու վրայ կեդրոնանալը: Այդպիսիք շատ են: Պէտք է պարզապէս զանոնք թուղթի վրայ շարադրել: Թէպէտ սկզբունքօրէն կողմերը կ’ընդունին, որ այդ մէկը անպատճառ պէտք է ընել, բայց երբ այդ ամէնը կը սկսի ձեւակերպումներու տեսք ստանալ, ինչպէս տարբեր պարագաներու ատեն, զանազան բարդութիւններ կը ծագին: Ես կը կարծեմ, որ մենք կը շարունակենք այդ մէկը յաղթահարել եւ ըստ այնմ կը հասնինք արդիւնքներու»,- բանակցային գործընթացի ներկայ փուլին անդրադարձած է Ռուսաստանի արտաքին գործոց նախարար Սերկէյ Լաւրովը: Աւելի պարզ՝ Մոսկուան շուտափոյթ զարգացումներ չի խոստանար, այլ կը կանխատեսէ, կամ թերեւս կը զգուշացնէ, որ անիկա գործընթաց է, ինչը կրնայ բաւականին երկար ժամանակ պահանջել, եւ կը յիշեցնէ, որ նոյնիսկ Ռուսաստան-Արեւմուտք ներկայ հակասութիւններու պայմաններուն Մինսքի խումբը կը շարունակէ աշխատիլ: Այս նամակներուն առաջին հասցէատէրը, թերեւս Ազրպէյճանի նախագահն էր: Իլհամ Ալիեւն ալ ռուսական լրատուամիջոցներուն տուած հարցազրոյցին մէջ անդրադարձած է ազրպէյճանա-ղարաբաղեան հակամարտութեան՝ աւանդական շեշտադրումներով՝ մեղադրելով միջազգային հանրութիւնը, որ Հայաստանի վրայ ճնշումներ չի գործադրեր: Նախագահը խօսած է նաեւ ազրպէյճանական բանակի հզօրացման մասին:

Թեմայի շարունակութեան տուն տուող գործօնը առաջնագիծէն հասած նորութիւններն են: Այս անգամ ոչ թէ Արցախի, այլ Հայաստանի Հանրապետութեան սահմաններէն: Նորութիւնը իր ֆէյսպուքեան էջին վրայ տարածեց Արծրուն Յարութիւնեան. «Ապրիլ 7-ին եւ Ապրիլ 7-8-ի գիշերը Նախիջեւանեան հատուածի ազրպէյճանական զինուած ուժերը մի քանի անգամ խախտած են հրադադարի ռեժիմը եւ կրակ արձակած հայկական զինուած ուժերու ուղղութեամբ՝ հիմնականը հրաձգային զէնքերէ: ՀՀ զինուած ուժերը պատասխան գործողութիւններով լռեցուցած են հակառակորդին։ ՀՀ ՊՆ կոչ կ’ընէ ազրպէյճանական զինուած ուժերուն զերծ մնալ հետագայ սադրանքներէն եւ կը զգուշացնէ, որ որեւէ քայլ անպատասխան չմնայ»:

Ապրիլ 8-ին ազրպէյճանական զինուժը կրակ բացած է նաեւ Տաւուշի մարզի սահմանամերձ Բաղանիս գիւղի ուղղութեամբ: Երեւանը գրաւելու խոստումներէն ետք ասիկա առնուազն անսպասելի պէտք չէ համարել: Սակայն նոյնիսկ անով խախտումներու աշխարհագրութիւնը չսահմանափակուեցաւ. Ապրիլ 9-ին՝ ժամը 14:20-ին, Արցախի ՊԲ հարաւային ուղղութեամբ տեղակայուած զօրամասերէն մէկուն պահպանութեան տեղամասին մէջ հակառակորդի կողմէ արձակուած կրակոցէն հրազէնային մահացու վիրաւորում ստացած է ՊԲ զինծառայող, 1998-ի ծնունդ Նարեկ Գէորգ Յարութիւնեանը:

Ստեփանակերտ

Share Button

Մեկնաբանել

Լրատուութեան գործընկեր