• London

  • Beirut

  • Moscow

  • Los Angeles

  • Paris

  • Sydney

  • Toronto

Կայացած Է Արցախի Նախագահի Պաշտօնամուտին Նուիրուած Հանդիսաւոր Նիստը

09.09.2017   05:56

     Ճանապարհին հանդիպողներու հետ զրուցելով, բայց առանց ուշացումի`  Նախագահ Բակօ Սահակեան Ազգային ժողով կը ժամանէ եւ ուղիղ կէսօրին, Արցախի թեմի առաջնորդին եւ Ազգային Ժողովի նախագահին ուղեկցութեամբ, կը մտնէ Խորհրդարանի նիստերու մեծ դահլիճ, ուր ներկայ էին Ազգային ժողովի 33 պատգամաւորներէն 31-ը, նախագահի պաշտօնամուտի արարողութեան նուիրուած յատուկ նիստին հրաւիրեալները:

     «ԱՀ Սահմանադրութեան համաձայն, 19 Յուլիս 2017-ին նիստի ընթացքին ընտրուած նախագահը՝ պաշտօնը կը ստանձնէ գործող նախագահի լիազօրութիւններու աւարտի օրը (7 Սեպտեմբերին) ԱԺ յատուկ նիստին տրուած երդումով: Առաջնորդուելով ԱԺ կանոնակարգով` յատուկ նիստը կը յայտարարեմ բացուած»,- կը հնչեցնէ նիստը նախագահող ԱԺ նախագահ Աշոտ Ղուլեան:

     Դահլիճ կը բերուին Արցախի Հանրապետութեան Սահմանադրութիւնը եւ 17-րդ դարու Աւետարանը: Ձեռքը Սահմանադրութեան ու Աւետարանին` Բակօ Սահակեան կ’երդուի, որ Արցախի անվտանգութիւնն ու տարածքային ամբողջականութիւնը կը մնան գերակայ խնդիր, իսկ երկրի զարգացումն ու զարգացող երկրի մէջ ժողովրդավարական հիմնարկներու ամրապնդումը` ծրագրային քաղաքականութիւն:

     Նախագահին եւ երկրին բարօրութիւն մաղթած է Արցախի թեմակալ առաջնորդը: Պարգեւ արքեպիսկոպոս Մարտիրոսեան կը գաղտնազերծէ իր ձեռքի խաչը,  կ’ամփոփէ 2007-ին Դադիվանքի մէջ բացուած Դադօ առաքեալի մասունքները: «Մեր աղօթքը կը յղեմ, որ նոյն աւիւնով շարունակէք այս վսեմ պարտականութիւնը` առաջնորդելու մեր երկիրը: Աստուած տայ, Ձեր առաջնորդութեամբ աւելի մօտենանք մեր ազգային իղձերու իրականացման»,- ընդգծած է ՀԱԷ ԱԹ առաջնորդ Պարգեւ արքեպիսկոպոս Մարտիրոսեան:

     Թէ ի՛նչ պիտի ընէ այդ ուղղութեամբ յառաջիկայ տարիներուն, ծրագրային դրոյթները Բակօ Սահակեանը ներկայացուցած էր ընտրուելուն օրը` Խորհրդարանի Յուլիս 19-ի նիստին: Պաշտօնամուտին նուիրուած յատուկ նիստին կը վստահեցնէ, որ իր ներկայացուցած ծրագիրները համատեղ կեանքի կոչելու բոլոր հնարաւորութիւնները կան: «Ես կ’ուզեմ ո՛չ թէ յոյս, այլ՝ համոզում յայտնել, որ մենք միասին ի վիճակի ենք հետեւողական աշխատանքով կեանքի կոչելու այդ ծրագիրները»,- ընդգծած է Արցախի նախագահ Բակօ Սահակեան:

     Բակօ Սահակեանի պաշտօնամուտով՝ Արցախի մէջ կը մեկնարկէ կիսանախագահականէն նախագահական կարգին անցնելու գործընթացին եւս մէկ փուլը, որ նախատեսուած է Փետրուար 20-ին ընդունուած Սահմանադրութեամբ: Իբրեւ անցումային շրջանի նախագահ` Բակօ Սահակեան ընտրուած է խորհրդարանին կողմէ եւ պիտի պաշտօնավարէ մինչեւ 2020: 2020-ին պիտի կայանան Նախագահի եւ Խորհրդարանի համաժողովրդական, համաժամանակեայ ընտրութիւնները:

Ստեփանակերտ

Share Button

Մեկնաբանել

Լրատուութեան գործընկեր