• London

  • Beirut

  • Moscow

  • Los Angeles

  • Paris

  • Sydney

  • Toronto

Մարտ 18-ը Կը Յայտարարենք Համազգային Աղօթքի Օր. Կաթողիկոսը Յորդոր Տարածած է

18.03.2020   10:27

Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը հայրապետական յորդոր տարածած է «քորոնա» ժահրին առնչութեամբ:

«Սիրելի բարեպաշտ ժողովուրդ,

Մտահոգութեամբ եւ աղօթքով կը հետեւինք «քորոնա» ժահրին շուրջ աշխարհի մէջ տեղ գտնող զարգացումներուն: Այս դժուար ժամանակներուն, երբ մարդկութիւնը փոթորկուած է համավարակի վտանգով, որմէ անմասն չէ Հայաստան աշխարհը, եւ խռովայոյզ է նաեւ մեր կեանքը, հայրաբար կը յորդորենք մեր հոգեւոր հայրերուն եւ հաւատացեալ ժողովուրդին՝ առաւելագոյն զգուշութիւն ցուցաբերելու եւ խուսափելու հանրային շփումներէ եւ կուտակումներէ։

Կոչ կ՝ընենք բոլորին՝ գործելու անձնական եւ հանրային բարձր գիտակցութեամբ եւ պատասխանատուութեամբ ոչ միայն մեր անձերու, այլեւ միմեանց հանդէպ հոգածութեամբ՝ խորապէս ըմբռնելով, որ այս պահուն իւրաքանչիւրի կեանքին անվտանգութիւնը նաեւ մեր անձնական պատասխանատուութիւնն է: Առ Աստուած ապաւինութեամբ կ՝աղօթենք վարակուածներուն եւ մեկուսացուածներուն ապաքինման եւ հոգեւոր ամրութեան համար։ Մեր բարձր գնահատանքն ու օրհնութիւնը կը բերենք օրուգիշեր իրենց անսակարկ ծառայութիւնը մատուցող մեր բժիշկներուն, որոնք առաւելագոյն ջանքեր կը ներդնեն իրենց ծառայութեան մէջ՝ գործելով արտակարգ իրադրութեան պայմաններու մէջ:

Առկայ կացութեան շուրջ խորհրդակցելով մեր Եկեղեցւոյ Նուիրապետական Աթոռներու գահակալներուն հետ եւ ստեղծուած իրավիճակը այսօր քննարկելով հայաստանեան եպիսկոպոսներու հետ՝ որոշեցինք․

Ա․ մինչեւ Աւագ Հինգշաբթի ինկած ժամանակահատուածի համար Եկեղեցիներու ծառայութեան ժամեր սահմանել իւրաքանչիւր օր ժամը 9։00-19։00՝ հաւատացեալներու անհատական այցելութիւններու եւ առանձնական աղօթքներու, ինչպէս եւ Սուրբ Հաղորդութեան եւ հոգեւոր միւս կենսական պահանջմունքներու բաւարարման համար,

Բ. Սուրբ Պատարագի արարողութիւնները իրականացնել դռնփակ, առանց հաւատաւոր ժողովուրդի մասնակցութեան՝ ըստ կարելիութեան տեղւոյն վրայ կազմակերպելով պատարագներու հեռասփռումը,

Գ. Ծաղկազարդի տօնին չեղարկել մանուկներու օրհնութեան կարգը, Անդաստանի արարողութիւնը եւ ճիւղերու օրհնութիւնը կատարել առանց հաւատացեալներու ներկայութեան,

Դ․ Սուրբ Աստուածածնի Աւետման տօնին՝ Ապրիլ 7-ին, չկատարել մայրութեան բերկրանքին սպասող կանանց օրհնութեան կարգը,

Ե․ չկատարել Ս․ Պսակի արարողութիւններ,

Զ․ Ս․ Մկրտութեան խորհուրդը կատարել խիստ անհրաժեշտութեան պարագայի (մկրտուողի հիւանդութեան պարագային),

Է․ յուղարկաւորութիւններու պարագային կատարել միայն Գերեզմանի կարգը՝ յորդորելով սգացեալները ձեռնպահ մնալու յուղարկաւորութեան եւ հոգեհացի մարդաշատ հաւաքներու կազմակերպումէն։

Սոյն որոշումները հրահանգելով եկեղեցական կառոյցներուն ի գործադրութիւն՝ յառաջիկայ Չորեքշաբթին՝ Մարտ 18, կը յայտարարենք համազգային աղօթքի օր՝ հրաւիրելով իւրաքանչիւրը ժամը 19:00-ին իր գտնուելու վայրին մէջ իր առանձնական աղօթքով միանալու հոգեւոր դասին՝ հայցելով, որ Տիրոջ օգնականութեամբ աշխարհը եւ մեր ժողովուրդը ի զօրու ըլլան միաբանութեամբ, փոխադարձ զօրակցութեան ոգիով յաղթահարելու այս փորձութիւնը։

Այս դժուար պահուն հարկ է, սիրելիներ, միասնական կերպով համախմբուելու եւ ամենայն աջակցութիւն ցուցաբերելու ՀՀ կառավարութեան ու պատկան մարմիններուն, խստօրէն հետեւելու թելադրուող բոլոր հրահանգներուն եւ իշխանութիւններու կողմէն սահմանուած պահանջներուն։

Մենք միասին՝ հանրային համերաշխութեամբ, քաղաքացիական եւ հոգեւոր բարձր պատասխանատուութեամբ ու գիտակցութեամբ եւ մեր Տիրոջ շնորհով ու ողորմածութեամբ կը յաղթահարենք նաեւ այս դժուարութիւնը: Կեանքը աստուածային պարգեւ է եւ ամենաթանկը, որուն պէտք է հոգ տանինք միմեանց հանդէպ սիրով։ Հիմա՛ է ժամանակը վկայելու մեր սիրոյ եւ միասնութեան մասին:

Տիրոջ օրհնութիւնը, շնորհն ու ողորմութիւնը թող ըլլան մեր հետ եւ ամէնքի․ ԱՄԷՆ»։

 

Share Button

Leave a Reply

Your email address will not be published. Required fields are marked *

Լրատուութեան գործընկեր