• London

  • Beirut

  • Moscow

  • Los Angeles

  • Paris

  • Sydney

  • Toronto

Ուսադիրներուն Արժէքը Կը Մեծնայ Իւրաքանչիւր Սպայի Հանդէպ Ենթականերու Ունեցած Յարգանքով. Փաշինեան

23.07.2019   09:20

«ԶԱՐԹՕՆՔ», ՊԷՅՐՈՒԹ –Վարչապետ Նիկոլ Փաշինեան, Պաշտպանութեան նախարարութեան մօտ, ներկայ եղած է ռազմաուսումնական հաստատութիւններու 2018-2019 ուսումնական տարուան շրջանաւարտներու աւարտական հանդէսին: Վարչապետը շնորհաւորած է բոլոր շրջանաւարտները ուսումնական հաստատութիւնները աւարտելու, սպայական կոչում ստանալու առիթով եւ խումբ մը շրջանաւարտներու անձամբ յանձնած աւարտական փաստաթուղթերը: 

Ինչպէս «Արմէնփրես»-ին այս մասին տեղեկացուցած են ՀՀ վարչապետի աշխատակազմի տեղեկատուութեան եւ հասարակայնութեան հետ կապերու վարչութենէն, դիմելով ներկաներուն՝ Նիկոլ Փաշինեան, մասնաւորապէս, նշած է. 

«Այսօր մեր աչքի առջեւ տեսարան մըն է, որ կը խորհրդանշէ այն սերնդափոխութիւնը, որ տեղի կ՝ունենայ Հայաստանի Հանրապետութեան մէջ, ՀՀ Զինուած ուժերուն մէջ: Այսօր այս հրապարակին կանգնած են մարդիկ, որոնք կը գտնուին արցախեան ազատամարտի ակունքներուն մէջ»,- ըսած է ՀՀ վարչապետը, նշելով, որ սպայական ծառայութիւնը կամային ամենաբարձր յատկանիշներ պահանջող ծառայութեան տեսակ է, որովհետեւ անիկա կը  պահանջէ անվերապահ կամք եւ առանց քննարկման հրամաններ իրականացնել, անվերապահ եւ առանց քննարկման ապահովել սեփական հրամաններու իրականացումը:

«Ըլլալ սպայ, ըլլալ հրամանատար, կը նշանակէ երբեմն այնպիսի գործողութիւններու ուղարկել սեփական ենթակաները, ուրկէ վերադառնալու հաւանականութիւնը մեծ չէ, ըլլալ սպայ կը նշանակէ անվերապահօրէն ստանձնել այնպիսի յանձնարարութիւններու կատարում, որոնցմէ վերադառնալու հաւանականութիւնը մեծ չէ»,- ըսած է Նիկոլ Փաշինեան՝ շեշտելով, որ իւրաքանչիւր սպայի հեղինակութիւնը պէտք է ըլլայ շատ աւելի մեծ, քան անոր ուսադիրներու զինուորական նշանակութիւնը։ «Աւելին՝ ուսադիրները, ուսադիրներու արժէքը կը մեծնայ իւրաքանչիւր սպայի նկատմամբ ենթականերու ունեցած յարգանքով, եւ այդ յարգանքը ձեռքբերում մըն է, որ ձեզմէ իւրաքանչիւրը պիտի վաստակէ եւ արդէն իսկ վաստակած է իր ծառայութեամբ, ուրիշներու նկատմամբ իր ունեցած յարգանքով, սեփական անձի հանդէպ ունեցած բացառիկ յարգանքով, սեփական հայրենիքի եւ ժողովուրդի հանդէպ ունեցած բացառիկ յարգանքով»,- ընդգծած է Փաշինեան:

Վարչապետը խօսած է նաեւ խաղաղութեան մասին: Ան նշած է, թէ Հայաստանի Հանրապետութիւնը խաղաղասիրական պետութիւն է եւ խաղաղութեան հիմնական երաշխիքը մեր Զինուած ուժերն են, մեր բանակը։ Ընդգծելով, թէ ինչպիսի խաղաղութիւն պէտք է մեր հայրենիքին՝ վարչապետը խօսած է չինական զինուորական ռազմավարութեան մասին՝ ընդգծելով,- «Տաղանդաւոր զօրավարները կը յաղթեն առանց պատերազմի: Մեզի հարկաւոր է  այսպիսի խաղաղութիւն»։

Վարչապետը իր խօսքի աւարտին նշած է. «Մենք բոլորս, անկախ անկէ, թէ ինչ համազգեստ կը կրենք, այս յաղթանակներուն նուիրուած զինուորներն ենք եւ մեզմէ իւրաքանչիւրը՝ առաջնագիծէն մինչեւ Ազգային ժողով եւ կառավարութեան շէնք, պէտք է ծառայենք այդ առաքելութեան, մենք բոլորս, անկախ անկէ, թէ ինչ տեսանելի ուսադիրներ կը կրենք, մենք բոլորս կը կրենք մեր ժողովուրդի, մեր պատմութեան, մեր նախնիներու, մեր սերունդներու, մեր ուսերուն դրած ուսադիրները եւ կեցցե՛նք մենք, որ փառքով կը կրենք եւ փառքով պիտի կրենք այդ ուսադիրները:

Եւ ուրեմն  կեցցէ՛ Հայաստանի Հանրապետութիւնը,

կեցցե՛ն Հայաստանի Հանրապետութեան զինուած ուժերը,

կեցցէ՛ Արցախի Հանրապետութիւնը,

կեցցէ՛ հայ ժողովուրդը եւ փա՛ռք մեր նահատակներուն, եւ փա՛ռք մեր սպաներուն ու զինուորներուն, եւ փա՛ռք մեր սերունդներուն, որոնք պիտի կրեն մեր յաղթանակներուն պատիւը, որոնք պիտի բազմապատկեն մեր յաղթանակները: Փա՛ռք ձեզ բոլորիդ եւ փառապանծ ծառայութիւն: Շնորհակալ եմ»:

 

Share Button

Leave a Reply

Your email address will not be published. Required fields are marked *

Լրատուութեան գործընկեր