• London

  • Beirut

  • Moscow

  • Los Angeles

  • Paris

  • Sydney

  • Toronto

Արմէն Սարգսեան Ընդունած է Եւրոպական Խորհուրդի Նախագահ Տոնալտ Դուսքը

11.07.2019   01:51

«ԶԱՐԹՕՆՔ», ՊԷՅՐՈՒԹ  –  ՀՀ նախագահ Արմէն Սարգսեան նախագահական նստավայրէն ներս ընդունած է Եւրոպական խորհուրդի նախագահ Տոնալտ Դուսքը:

Այս մասին կը յայտնէ «Արմէնփրես», վկայակոչելով ՀՀ նախագահի աշխատակազմի հասարակայնութեան հետ կապերու վարչութիւնը։ Աղբիւրիh համաձայն նախագահ Սարգսեան ողջունած է Տոնալտ Դուսքի այցը Հայաստան եւ վստահութիւն յայտնած, որ ան մեծ բաւականութիւն պիտի ստանայ մեր երկիր կատարած այցէն, մանաւանդ որ Հայաստան այն երկիրն է, որ կը կիսէ եւրոպական արժէքները։

«Հայաստան ոչ միայն համաձայնագիր ստորագրած է Եւրոմիութեան հետ, այլեւ այն երկիրն է, որ մասնաւորապէս մշակութային առումով խորապէս եւրոպական է եւ միշտ այդպիսին եղած է։ Ուստի, աւելի քան բնական է, որ աւելի մօտ կը դառնանք Եւրոմիութեան։ Հայաստան մշտապէս եղած է եւրոպական արժէքներու բնօրրան՝ սկսեալ մեր կրօնէն, մշակոյթէն մինչեւ գրականութիւն ու երաժշտութիւն»,- նշած է նախագահ Սարգսեան։

Անդրադառնալով Հայաստան-Եւրոմիութիւն յարաբերութիւններուն՝ Հանրապետութեան նախագահը համոզում յայտնած է, որ յառաջիկային յարաբերութիւնները Եւրոմիութեան հետ աւելի պիտի սերտանան եւ խորանան։ «Մենք անոր համար մեծ ներուժ ունինք»,- ընդգծած է Արմէն Սարգսեան: Ան Տոնալտ Դուսքը հրաւիրած է Հայաստան այցելել նաեւ ընտանիքի հետ։

Եւրոպական խորհուրդի նախագահը շնորհակալութիւն յայտնածէ ջերմ ընդունելութեան համար՝ նշելով, որ ասիկա իր երրորդ այցն է Հայաստան։ «Ես ինքզինքս կը զգամ ինչպէս տանս մէջ»,- նշած է ան։

Առանձնազրոյցի ընթացքին Հանրապետութեան նախագահն ու Եւրոպական խորհուրդի նախագահը մտքեր փոխանակած են Հայաստան-Եւրոմիութիւն օրակարգային շարք մը հարցերու շուրջ, ինչպէս նաեւ անդրադարձած տարբեր ոլորտներէն ներս  համագործակցութեան։ 

Share Button

Leave a Reply

Your email address will not be published. Required fields are marked *

Լրատուութեան գործընկեր