• London

  • Beirut

  • Moscow

  • Los Angeles

  • Paris

  • Sydney

  • Toronto

Մարդ Կը Մահանայ Այն Պահուն, Երբ Կը Դադրի Սորվիլ. ՀՀ Նախագահի Հարցազրոյցը Բրիտանական Financial Times Պարբերականին

18.06.2019   01:42

«ԶԱՐԹՕՆՔ», ՊԷՅՐՈՒԹ –  Բրիտանական հեղինակաւոր Financial Times պարբերականը «Լանչ Financial Times-ի հետ» խորագրի ծիրէն ներս Երեւանի մէջ հանդիպած եւ զրուցած է Հայաստանի նախագահ Արմէն Սարգսեանի հետ: ինչպէս կը յայտնէ «Արմէնփրես», վկայակոչելով ՀՀ նախագահի աշխատակազմի հասարակայնութեան հետ կապերու վարչութիւնը, խորագրի ծիրէն ներս Financial Times-ի լրագրողները սովորաբար յայտնի հիւրի հետ կը ճաշեն եւ կը զրուցեն տարբեր հարցերու շուրջ: Խորագրի նախորդ հիւրերէն են ԱՄՆ նախկին պետքարտուղար Ջոն Քերին, ամերիկացի դիւանագէտ Հենրի Քիսինճըր, Գերմանիոյ Պունտեսթակի նախագահ Վոլֆկանկ Շոյպլըն, ԱՄՆ Քալիֆորնիա նահանգի նախկին նահանգապետ, դերասան Առնոլտ Շուարցնեկըր եւ այլք:

Ստորեւ կը ներկայացնենք  հարցազրոյցէն հատուածներ.

«Վերջ ի վերջոյ, Սարգսեան իր 65 տարիներու ընթացքին մի քանի կեանք ապրած է: «Կեանքը մշտապէս քեզ կը նախապատրաստէ բանի մը, դուն պարզապէս երբեք չես գիտեր, թէ ինչի»,- կ’ըսէ նախագահը։

….Գործի դնելով իր մեծ դիւանագիտական կարողութիւնները՝ Սարգսեան (FT – Արմէն) յանուն կարգաւորման՝ բանակցեցաւ երկու կողմերուն հետ, խորհրդատուութիւններ ունեցաւ Ռուսաստանի, ԱՄՆ եւ ԵՄ ներկայացուցիչներու հետ։ Ան բոլոր կողմերուն կոչ ըրաւ միաւորուիլ ամէն տարի Ապրիլ 24-ին նշուող՝ 1915 թուականի Հայոց ցեղասպանութեան տարելիցին ընդառաջ։ Կարճ ժամանակ անց տեղի ունեցաւ Սարգսեանի (FT – Սերժ) հրաժարականը՝ ճանապարհ բանալով նոր ընտրութիւններու համար։ Բարեբախտաբար, Հայաստան խուսափեցաւ հակամարտութենէն։ Սարգսեան շատ գոհ է այն զսպուածութենէն, զոր ցուցաբերեցին բոլոր կողմերը, որոնց շնրքին էր նաեւ՝ Ռուսաստանի նախագահ Վլատիմիր Փութինը։ «Կարծեմ՝ ամէն ոք ճիշտ գործեց»,- կ’ըսէ ան։

….Ան մասնաւորապէս կը յիշէ 1990 թուականին Մարկրիթ Թաչըրի այցը Հայաստան, որ յաջորդած էր 1988 թուականին 45 հազար մարդու կեանք խլած աւերիչ երկրաշարժին։ Թաչըր ժամանած էր Մոսկուայէն, ուր կարեւոր քննարկումներ ունեցած էր այն ժամանակուայ Խորհրդային Միութեան առաջնորդ Միխայիլ Կորպաչովի հետ։ Սարգսեանին տպաւորած էր անոր «կարգապահութիւնն ու մտքի պայծառութիւնը», ինչպէս նաեւ մանրուքներու նկատմամբ անոր յիշողութիւնը։ Սարգսեան մեծապէս տպաւորուած էր նաեւ լսելու եւ սորվելու անոր կարողութեամբ, մարդկային որակներ, որոնք Սարգսեան շատ բարձր կը գնահատէ։ «Մարդիկ, ովքեր գիտեն լսել, կրնան սորվիլ: Այն պահուն, երբ կը դադրիս սովորիլ, կը մահանաս: Տարիքը ապրած տարիներու քանակը չէ: Տարիքը հոգեվիճակ է»,- կ’ըսէ ան։

Սարգսեան վճռական է՝ խորացնել Սփիւռքի ներգրաւուածութիւնը պատմական հայրենիքի մէջ։ «Անոնք պէտք է հաւատան, որ աւելի մեծ ընտանիքի մաս կը կազմեն,-կ’ըսէ ան, – մենք պէտք է ըլլանք հանգոյց նոր գաղափարներու եւ գիտարուեստներու համար եւ պիզնէսով զբաղինք տարբեր վայրերու մէջ»։

Սարգսեան առաւելաբար հետաքրքրուած է ժամանակակից աշխարհի կարեւոր կողմերէն մէկով, թէ ինչպէս վերջին գիտարուեստական յեղափոխութիւնը կը փոխէ քաղաքականութեան շարժունակութիւնը։

Ես հարցուցի Սարգսյանին, թէ իր մի քանի կեանքերէն ո՞ր մէկը ամենաշատը հաւնած է։ Անոր պատասխանը ե՛ւ ուսողական էր, ե՛ւ դիւանագիտական։ «Անոնցմէ իւրաքանչիւրը։ Բոլորն ալ իմս էին։ Երբ ես կ’ապրէի N կեանքս, ես չէի մտածեր N+1 կեանքի մասին,- կ’ըսէ ան։ – Ես պարզապէս կը փորձէի լիարժէքօրէն ապրիլ այդ կեանքը»։

Share Button

Leave a Reply

Your email address will not be published. Required fields are marked *

Լրատուութեան գործընկեր