• London

  • Beirut

  • Moscow

  • Los Angeles

  • Paris

  • Sydney

  • Toronto

Չինաստանի Վարչապետը Կարեւորած է Հայաստանի Հետ Երկկողմ Տնտեսական Կապերու Յետագայ Զարգացումը

16.05.2019   02:33

«ԶԱՐԹՕՆՔ», ՊԷՅՐՈՒԹ –Աշխատանքային այցով Չինաստանի Ժողովրդական Հանրապետութիւն գտնուող վարչապետ Նիկոլ Փաշինեան Ժողովրդական ներկայացուցիչներու պալատի մէջ հանդիպում ունեցած է ՉԺՀ պետական խորհուրդի նախագահ (վարչապետ) Լի Քեցեանի հետ:

Ինչպէս կը յայտնէ «Արմէնփրես», վկայակոչելով ՀՀ վարչապետի աշխատակազմի տեղեկատւութեան եւ հասարակայնութեան հետ կապերու վարչութիւնը, ՉԺՀ վարչապետը ողջունած է Նիկոլ Փաշինեանը՝ կարեւորելով անոր այցը եւ վստահութիւն յայտնած, որ անիկա կը նպաստէ հայ-չինական յարաբերութիւններու յետագայ զարգացման ու ամրապնդման: Ան ընդգծած է երկկողմ դարաւոր կապերու փաստը եւ աւելցուցած, որ անիկա լաւ հիմք է Չինաստանի եւ Հայաստանի միջեւ փոխգործակցութեան նոր թափ հաղորդելու համար: «Մենք կրնանք սերտօրէն համագործակցիլ տարբեր ոլորտներէն ներս` նկատի առնելով մեր երկու երկիրներու ընդհանրութիւնները: Անոր համար առկայ է ամուր քաղաքական հիմք»,- ընդգծած է Լի Քեցեան:

Վարչապետ Փաշինեան շնորհակալութիւն յայտնած է ջերմ ընդունելութեան համար եւ նշած. «Շատ ուրախ եմ այս հանդիպման համար։ «Ասիական քաղաքակրթութիւններու երկխօսութեան» համաժողովը շատ կարեւոր է մեզի համար: Կայացաւ համաժողովի բացումը, որ շատ տպաւորիչ էր։ Այս համաժողովը լաւ հնարաւորութիւն է քննարկելու յետագայ համագործակցութեան հարցերը։ Ես շատ ուրախ եմ այդ հնարաւորութեան եւ համաժողովի ծիրէն ներս Ձեզի հետ հանդիպելու համար։ Հայաստանն ու Չինաստանը ունին ընդհանուր շահեր։ Ես կը կարծեմ, որ այս այցելութիւնը նոր խթան պիտի ըլլայ աշխատելու այն ծրագիրներու շուրջ, որոնք կը ներկայացնեն Հայաստանի եւ Չինաստանի շահերը»։ Նիկոլ Փաշինեան կարեւորած է փոխգործակցութիւնը արդիւնաբերութեան, փոխադրամիջոցներու, տեղեկատուական եւ գիտարուեստներու ոլորտներէն ներս:

Լի Քեցեան եւս կարեւորած է երկկողմ տնտեսական կապերու յետագայ զարգացումը` նշելով, որ չինական կողմի մօտեցումները կը համընկնին վարչապետ Փաշինեանի հնչեցուցած ոլորտային առաջնահերթութիւններուն հետ:

Զրուցակիցները քննարկած են առեւտրաշրջանառութեան, արդիւնաբերութեան, փոխադրամիջոցներու, տեղեկատուական գիտարուեստներու, գիւղատնտեսութեան ոլորտներէն ներս համագործակցութեան ընդլայնման ու խորացման վերաբերող հարցեր: Կողմերը անդրադարձած են նաեւ Հիւսիս-հարաւ մայրուղիի կառուցման եւ Հայաստանի մէջ այլ ենթակառուցուածքային ծրագիրներու իրականացման ուղղութեամբ համագործակցութեան: Լի Քեցեան շեշտած է, որ Չինաստանի կառավարութիւնը պատրաստակամ է ներգրաւուելու նշուած ծրագիրներուն:

Կողմերը քննարկած են «Մէկ գօտի մէկ ճանապարհ» նախաձեռնութեան ծիրէն ներս համատեղ նախագիծերու իրականացման հնարաւորութիւնները, մասնաւորապէս, փոխադրամիջոցներու, երկաթուղային, տեղեկատուական ենթակառուցուածքներու ոլորտներէն ներս ծրագիրներու իրականացումը:

Ապա վարչապետ Նիկոլ Փաշինեան եւ Չինաստանի պետական խորհուրդի նախագահը հայ-չինական տնտեսական յարաբերութիւններու օրակարգային հարցերը քննարկած են ճաշի ընթացքին:

Հանդիպման մասնակցած են նաեւ ՀՀ փոխադրամիջոցներու, կապի եւ տեղեկատուական արհեստագիտութեանց նախարար Յակոբ Արշակեան, Չինաստանի արտաքին գործերու նախարար եւ Արդիւնաբերութեան ու տեղեկատուական գիտարուեստներու նախարարները:

Share Button

Leave a Reply

Your email address will not be published. Required fields are marked *

Լրատուութեան գործընկեր