• London

  • Beirut

  • Moscow

  • Los Angeles

  • Paris

  • Sydney

  • Toronto

Ն.Ս.Օ.Տ.Տ. Արամ Ա. Կաթողիկոս Ընդունեց Այցելութիւնը Հայ Կաթողիկէ Ամենապատիւ Գրիգոր Պետրոս Ի. Կաթողիկոս Պատրիարքին

11.01.2018   17:33

Ն.Ս.Օ.Տ.Տ. Արամ Ա. Վեհափառ Հայրապետը Անթիլիասի Մայրավանքին մէջ ընդունեց Ամենապատիւ եւ Գերերջանիկ Գրիգոր Պետրոս Ի. Հոգեւոր Տէրը։ Հոգեւոր Տիրոջ կ’ընկերանային Պէյրութի հայ Կաթողիկէ Թեմի օգնական եպիսկոպոս՝ Արհիապատիւ Գէորգ Ասատուրեան, Արհիապատիւ Մանուէլ Եպս․ Պաթագեան եւ հայ կաթողիկէ պատրիարքարանի տեղեկատուական բաժանմունքի պատասխանատու Գերպ. Սեպուհ Վրդ. Կարապետեան։ Հանդիպման ներկայ էին նաեւ Գերշ. Տ. Կոմիտաս Արք. Օհանեան եւ Կաթողիկոսարանի տեղեկատուական բաժանմունքի վարիչ Հոգշ. Տ. Պետրոս Վրդ. Մանուէլեան։

Շուրջ ժամ մը տեւած հանդիպումը առիթ մը եղաւ՝ քննարկելու Հայաստան-Սփիւռք գործակցութեան, Լիբանանի մէջ տեղի ունենալիք երեսփոխանական յառաջիկայ ընտրութիւններուն, Սուրիոյ հայութեան վերականգնումի գծով տարուող աշխատանքներուն եւ ընդհանրապէս Միջին Արեւելքի հետ աղերս ունեցող հարցեր։

Նշենք, որ շուրջ շաբաթ մը առաջ Նորին Սրբութեան այցելած էին նաեւ Մերձաւոր Արեւելքի Հայ Աւետարանական Եկեղեցիներու Միութեան նախագահ՝ Վեր. Մկրտիչ Գարակէօզեան եւ նոյն միութեան Կեդրոնական վարչութեան ատենապետ եւ Հայկազեան համալսարանի նախագահ՝ Վեր. Դոկտ. Փոլ Հայտոսթեան։ Յայտնենք, որ Մեծի Տանն Կիլիկիոյ Կաթողիկոսութեան, Հայ Կաթողիկէ եւ Հայ Աւետարանական եկեղեցիներուն միջեւ գոյութիւն ունեցող գործակցութիւնը աւելի կը ծաւալի. երեւոյթ մը, որ մեծապէս կը նպաստէ մեր ժողովուրդին ներքին միասնականութեան ամրապնդման։

 

 

Share Button

Մեկնաբանել

Լրատուութեան գործընկեր