• London

  • Beirut

  • Moscow

  • Los Angeles

  • Paris

  • Sydney

  • Toronto

ՀԵԸ Անդրանիկ Անթիլիաս  Հասաւ   Պասքեթպոլի Ախոյեանութեան   Ֆայնըլ Ֆոր-ին

11.02.2020   00:11

Մարզական  կեանքը  ծանօթ պատճառներով ժամանակաւորապէս  անդամալուծուելէ  ետք,  վերջին  օրերուն աստիճանաբար կը վերագտնէ իր  երէկի աշխուժութիւնը:

 Կիրակի, 9 փետրուար  2020-ին,Լիբանանի  տղոց  պասքեթպոլի չորրորդ  դասակարգի ախոյեանութեան մրցումներուն  1/8-րդ  փուլին, ՀԵԸ Անդրանիկ Անթիլիասի տղաքը, շարունակելով իրենց  յաղթական երթը՝  63- 56 արդիւնքով պարտութեան մատնեցին Ֆիտա Սայտան եւ հասան ախոյեանութեան «Ֆայնըլ Ֆոր»ի փուլը:  Մրցումը տեղի ունեցաւ  Շիահի մարզադաշտին մէջ:

  Համայն  ՀԵԸ-ականներուն եւ  մարզասէր  ընթերցողներուն ուշադրութեան կը յանձնենք, որ   Լիբանանի չորրորդ դասակարգի պասքեթպոլի ախոյեանութիւնը սկսաւ անցնող տարի`  96  խումբերու մասնակցութեամբ: ՀԵԸ Անդրանիկ Անթիլիասի  տղաքը,  նախնական  փուլի   մրցումներուն պարտութեան մատնեցին իրենց մրցակիցները եւ նախքան  հոկտեմբեր ամիսը   թեւակոխեցին 1/16-րդ փուլ, ուր՝  80-52 արդիւնքով պարտութեան մատնեցին Շարիթէի  կազմը:

 «Ֆայնըլ Ֆոր» հասնող  խումբերուն, առաջին երեք դիրք գրաւողները ինքնաբերաբար պիտի  բարձրանան  երրորդ դասակարգ, իսկ  4-րդ դիրք գրաւող կազմը պիտի  պայքարի երրորդ դասակարգի վերջին դիրքը գրաւողին դէմ: Յաղթողը  նոյնպէս պիտի մասնակցի  երրորդ դասակարգի  ախոյեանութեան մրցումներուն:

 Յաջողութիւն կը  մաղթենք ՀԵԸ Անդրանիկ Անթիլիասի  տղոց խումբին, մարզչական կազմին եւ  բոլոր պատասխանատուներուն:

 ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ

Share Button

Leave a Reply

Your email address will not be published. Required fields are marked *

Լրատուութեան գործընկեր