• London

  • Beirut

  • Moscow

  • Los Angeles

  • Paris

  • Sydney

  • Toronto

Կիլիկիոյ Կաթողիկոսութեան Դպրեվանքի Սաները Այցելեցին Մեսրոպեան Վարժարան (լուսանկարներ)

16.03.2019   02:34

Չորեքշաբթի, 13 Մարտ 2019-ին Մեծի Տանն Կիլիկիոյ կաթողիկոսութեան դպրեվանքի Ա. եւ Բ. ընծայարանի սաները, գլխաւորութեամբ Հոգշ. տ. Զաւէն աբղ. Նաճարեանի, ժամանեցին Հայ կաթողիկէ Մեսրոպեան բարձրագոյն վարժարան: Քառասնօրեայ պահեցողութեան ընթացքին, դպրեվանքի առաքելութեան եւ աւանդութեան մաս կը կազմեն լիբանանահայ զանազան վարժարաններու եւ հաստատութիւններու այցելութիւնները, անոնց խօսելու պահեցողութեան խորհուրդին եւ դպրեվանքի առաքելութեան մասին: 

Վարժարանի տնօրէն պրն. Կրէկուար Գալուստ դպրեվանեցիները հիւրընկալեց իր գրասենեակը, ուր անոնց ամփոփ ձեւով ներկայացուց Մեսրոպեանի առաքելութիւնն ու ծրագիրները: Ապա տեղի ունեցան առանձին երկու հանդիպումներ` միջնակարգ եւ երկրորդական բաժիններու աշակերտներուն հետ «Ֆարաճեան» սրահին մէջ, ուր հիւրերուն կողմէ պատրաստուած յայտագիր մը ներկայացուեցաւ:

Բացման խօսքը կատարեց Տեմիս Այվազեան, որ ընդհանուր գիծերով ներկայացուց դպրեվանքի առաքելութիւնը: Ապա հերթաբար երգուեցան Արեւագալի հոգեշունչ շարականներէն պատառիկներ, որմէ ետք Բարշ. Աբրահամ սրկ. Տեկիրմէնճեան խօսեցաւ պահքի եւ աղօթքի կարեւորութեան մասին: Բարշ. Նուպար Կիս. Փամփալեան ներկայացուց Պիքֆայայի Ս. Աստուածածին վանքի համալիրը: Յայտագրի փակումը կատարեց Հոգշ. տ. Զաւէն աբղ. Նաճարեան, որմէ ետք Մեսրոպեանի հոգեւոր տեսուչ Արժանապատիւ տ. Ռաֆֆի քահանայ Յովհաննէսեան իր անհուն ուրախութիւնն ու սրտի խօսքը յայտնեց վարժարանի ուսանողներուն եւ դպրեվանեցիներուն: Պրն. Կրէկուար Գալուստ խորին շնորհակալութիւն յայտնեց դպրեվանեցիներուն, որմէ ետք դպրեվանքին կողմէ յուշանուէր մը փոխանցուեցաւ պրն. տնօրէնին:

Աւարտին, բոլորը միասին Մեսրոպեանի շրջափակին կեդրոնը գտնուող Ս. Մեսրոպ Մաշտոցի յուշակոթողին դիմաց խմբանկար մը առնելով եզրափակեցին այս պատմական օրը:

(Տեղեկութիւնը հիմնուած է Դպրեվանքի տարածած հաղորդագրութեան վրայ)

 

Տեղեկատուական գրասենեակ
Հայ Կաթողիկէ Մեսրոպեան Բարձրագոյն Վարժարանի

Share Button

Leave a Reply

Your email address will not be published. Required fields are marked *

Լրատուութեան գործընկեր