• London

  • Beirut

  • Moscow

  • Los Angeles

  • Paris

  • Sydney

  • Toronto

Ուսուցչաց Տօնի Ոգեկոչում-Մեծարում (լուսանկարներ)

15.03.2019   01:41

ՀԲԸՄ-ի Վարժարաններ 

Ուսուցչաց օրը այս տարի եւս տեղի ունեցաւ արժանի կերպով, որ մեծապէս գնահատուեցաւ աշակերտութեան եւ ուսուցչութեան կողմէ:

Արդարեւ, 6 Մարտ 2019-ին ատենամարզանքի պահը ինքզինք կը գերազանցէր  ուսուցչութիւնը բնորոշող խորհրդանշաններով ու գծապատկերներով՝ գեղազարդարուած արուեստի ու գծագրութեան ուսուցչուհի տիկ. Թամարա Շիր Յակոբեանի կողմէ՝ յատուկ գոյն տալով օրուան մթնոլորտին:

Յայտագիրը ճոխ էր, բազմաբնոյթ ու խայտաբղէտ՝ իր նիւթերով ու ներկայացումներով, որոնք աւելի կը շեշտէին ուսուցիչի նկատմամբ մեծարումի զգացումը, որոնց իրագործման համար շնորհակալ աշխատանք տարած էին ուսուցչուհիներ՝ տիկնայք Միրնա Ֆատտուլը, Հելեն Ապու Հայտարը եւ Աննա Մարիա Արթինը:

Ուշագրաւ ու հետաքրքրաշարժ բաժին էին չորս կտորներով այն հարցազրոյցները, որոնք տեղի ունեցան աշակերտութեան (Կարօ Գոթահալեան եւ Կայէլ Էլսուէյտի) եւ պրն. տնօրէն Արա Վասիլեանի, տիկ. Լէյլա Ֆարհաթի ու պրն. Պարոյր Աղպաշեանի միջեւ՝ առնչուած ուսուցչութեան, ուսուցումի ու կրթական տարբեր հարցերու՝ ուսուցչական ասպարէզը ջատագովող եւ յատկանշող բացատրութիւններով՝ մեկնելով իրենց տեսիլքներէն ու փորձառութիւններէն:

Յայտագիրը այնուհետեւ զարգացաւ հետեւեալ յաջորդականութեամբ.

  • Արտասանութիւն՝ «Հայ ուսուցիչին», երգ՝ «A part of who I am», Գ. դասարան
  • Պար՝ «Նազ պար», Բ. դասարան
  • Տեսերիզով ուսուցիչ-աշակերտ յարաբերութեանց ընդմէջէն, ապագայական հանդիպումներ ու դասարանային պատկերներ, ԺԱ. դասարան
  • «Պարի-պարի» պարային ներկայացում, Է. դասարան
  • Պար «Taki Taki», Բ. դասարան
  • Երգ՝ «Ողջոյնի երգ», Բ. դասարան
  • Արտասանութիւն՝ «Ուսուցիչը», Ժ. դասարան
  • Արտասանութիւն՝ Ե. դասարան
  • Խօսքեր՝ նուիրուած ուսուցիչին, Դ. եւ Ե. դասարաններ
  • Արտասանութիւն՝ Է. դասարան

Աշակերտութիւնը մեծ ոգեւորութեամբ ապրեցաւ ուսուցչութեան նուիրուած հոգեպարար այս պահերը, այն գիտակցութեամբ, որ ուսուցչութիւնը անփոխարինելի հզօրութիւն մըն է:

11-րդ դասարանը գեղեցիկ, վարակիչ եւ զուարթախոհ ելոյթով մը հանդէս եկաւ, երբ լիբանանեան «զաժել»-ի երգեցողութեամբ իւրաքանչիւր ուսուցիչի բարեմասնութիւններուն, յատկանիշներուն ու բնաւորական գիծերուն անդրադարձաւ ծիծաղաշարժ եւ երգիծախառն հպումներով՝ արժանանալով աշակերտութեան բուռն խանդավառութեան:

Հայ գրականութեան վերի կարգի ուսուցիչ պրն. Պարոյր Աղպաշեան այս առիթով նախ գնահատեց եւ շնորհաւորեց այն բոլոր նախաձեռնող ուսուցիչներն ու մասնակից աշակերտները, որոնք գիտցան ուսուցիչին դերն ու տեղը շեշտել՝ արժեւորելով անոր բերած նուիրեալ եւ երախտաշատ ներդրումը նոր սերունդներու կազմաւորումին ու դաստիարակութեան մէջ:

Ապա, խօսելով ուսուցիչին առաքելութեան եւ յանձնառութեան մասին, կարեւորեց այդ գործը նոր սերունդներու հասունացումին եւ կրթութեան մէջ իր կատարած ներգործութեան ու ներազդեցութեան դրոշմելի չափանիշներով՝ կոչ ընելով, որ ուսուցչաց տօնը չմնայ միայն յայտարարուած պաշտօնական թուականին մէջ, այլ ամէնօրեայ երախտագիտութեան արժանանայ՝ այս առիթով ջերմօրէն շնորհաւորելով բոլոր ուսուցիչները՝ նորանոր յաջողութիւններ մաղթելով անոնց:

Պրն. տնօրէնը իր գոհունակութիւնը յայտնեց ի տես աշակերտութեան այս գօտեպնդիչ երախտապարտական արտայայտութեանց, աշակերտական մակարդակով ուսուցիչը պատուելու եւ յարգելու, շնորհաւորեց մասնակից շնորհալիները, մանաւանդ այն ուսուցչուհիները, որոնք այս յաջողութեան մէջ իրենց գնահատելի մասնակցութիւնը բերին:

 

Share Button

Leave a Reply

Your email address will not be published. Required fields are marked *

Լրատուութեան գործընկեր