• London

  • Beirut

  • Moscow

  • Los Angeles

  • Paris

  • Sydney

  • Toronto

Կայացաւ Մեսրոպեան Վարժարանի Տարեկան Բարեսիրական Ընթրիքը` 80-Ամեակին Առթած Տօնական Մթնոլորտին Մէջ (լուսանկարներ)

08.02.2019   02:16

Մեսրոպեան վարժարանին եւ անոր աշակերտութեան նկատմամբ բարեկամութեան եւ զօրակցութեան տօն հանդիսացաւ Հայ կաթողիկէ Մեսրոպեան բարձրագոյն վարժարանի տարեկան բարեսիրական ընթրիքը, որ այս տարի զուգադիպեցաւ վարժարանի հիմնադրութեան 80-ամեակին: Անիկա կայացաւ 2 Փետրուար 2019-ին   Le Royal պանդոկի Azurea շքեղ դահլիճին մէջ, ներկայութեամբ մօտ 250 հրաւիրեալներու` Լիբանանի հայ կաթողիկէ համայնքի հոգեւորական եւ աշխարհական դասի ներկայացուցիչներ, միութենական պատասխանատուներ, նախկին եւ ներկայ երեսփոխաններ, նախարարներ ու պետական պաշտօնատարներ, ինչպէս նաեւ բարերարներ՝ Լիբանանէն եւ արտասահմանէն:

Ընթրիքի հովանաւորն էր Տանն Կիլիկիոյ Կաթողիկէ Հայոց Գրիգոր Պետրոս Ի. Կաթողիկոս Պատրիարքը, նախագահը` պարոն Վարուժ Ներկիզեան, որ Մեսրոպեանի գլխաւոր բարերարը կը հանդիսանայ երկար տարիներէ ի վեր:

Ներկաներուն ուղղուած իր խօսքին մէջ, Մեսրոպեան վարժարանի տնօրէն պարոն Կրէկուար Գալուստ շնորհակալութիւն յայտնեց Ամենապատիւ Հոգեւոր Տիրոջ, որ յանձն առաւ անձնապէս հովանաւորելու յոբելենական ընթրիքը: «Հոգեւոր տիրոջ հոգատար անձին մէջ մենք կը տեսնենք խորհրդանիշը Մեսրոպեան վարժարանի հիմնադիր սերունդին: Ան հսկողն է Մեսրոպեանի 80-ամեայ աւանդին, որուն կերտողներէն մէկը ինքն եղաւ»,- ըսաւ ան:

Խօսքը ուղղելով ներկաներուն, պարոն Գալուստ դիտել տուաւ. «Բնաւ չափազանցութիւն չէ հաստատելը, որ լիբանանահայ դպրոցը կը նմանի նաւու մը, որ կը փորձէ շարունակել իր երթը` տարուէ-տարի աւելի ալեկոծ դարձող ծովու մը մէջ: Դուք այստեղ էք, որպէսզի կրթութեան այս նաւուն պատերը մնան առողջ, որ անոր կայմերը ըլլան տոկուն ու դրօշը՝ միշտ բարձր, որպէսզի անոր ճամբորդները հասնին ցանկալի ափերը»: Մեսրոպեանի տնօրէնը աւելցուց. «Պիտի երթանք Մեսրոպեանի 80-ամեայ աւանդին զօրութեամբ եւ հաւատարմութեամբ: Տուած ենք խոստումը զարգացումի եւ յառաջընթացի, ծրագրաւորուած աշխատանքի եւ արհեստավարժութեան ու պիտի պահենք զայն: Պիտի աշխատինք, որ Մեսրոպեանը ապահովէ մանուկներուն եւ պատանիներուն կրթութիւնը այնպէս, որ անոնք կեանք մուտք գործեն որպէս հաւատաւոր քրիստոնեաներ, ազգասէր ու հայրենասէր հայեր, քաջակորով քաղաքացիներ եւ մարդիկ, որոնք տալիք ունին աշխարհին»:

Ապա խօսք առաւ ընթրիքի նախագահը՝ լիբանանեան եւ արաբական դրամատնային մարզի առաջնորդներէն, կրթական եւ ներդրումային  շարք մը հիմնադրամներու եւ ծրագիրներու ղեկավար յայտնի գործարար եւ բարեգործ պարոն Վարուժ Ներկիզեան: Ան մեծապէս գնահատեց Մեսրոպեանի մէջ տարուող կրթական եւ դաստիարակչական գործը, որ յառաջընթաց կ’արձանագրէ տարուէ-տարի՝ քայլ պահելով նոր դարաշրջանի մը կրթական պահանջներուն հետ: Պարոն Ներկիզեան ոգեկոչեց յիշատակը Մեսրոպեանի հիմնադիր սերունդի վարդապետներուն եւ հանգուցեալ պատասխանատուներուն, որոնք դարբնեցին կրթութեան այս օճախը նուիրումով եւ ձեռնհասութեամբ` կեանքի ճանապարհ հարթելով տասնեակ հազարաւորներու համար: Ան շնորհաւորեց Մեսրոպեանի գործող տնօրէն պարոն Կրէկուար Գալուստն ու անձնակազմը, որոնք, Գրիգոր Պետրոս Ի. Կաթողիկոս Պատրիարքի հսկողութեամբ, արժանիօրէն կը շարունակեն սերունդներու պատրաստութեան առաքելութիւնը` Մեսրոպեանի յարկին տակ:

Մեսրոպեանի տնօրէն պարոն Կրէկուար Գալուստ վարժարանին անունով շնորհակալութեան յատուկ նշանով մը պատուեց պարոն Վարուժ Ներկիզեանը:

Խօսք առաւ Հայ Կաթողիկէ Պատրիարքապատկան վարժարաններու Վարչական Խորհուրդի Նախագահի Տեղակալ Գերպծ. Հ. Գաբրիէլ Թ.Ծ.Վ. Մուրատեան, որ կամքէ անկախ պատճառներով ընթրիքէն բացակայող Հոգեւոր տիրոջ անունով շնորհաւորեց Մեսրոպեանի ընտանիքը` 80-ամեայ յոբելեանին առիթով եւ շեշտեց, որ յանձին Մեսրոպեանի, Հայ կաթողիկէ նուիրապետութիւնը մշտապէս զօրավիգ պիտի կանգնի հայ դպրոցին, զայն համարելով հայ ազգի յարատեւութեան երաշխիքը` եկեղեցիին հետ միասին:

Անկեղծ բարեկամութեան մթնոլորտի մը մէջ, ներկաները նուիրատուութիւններ կատարեցին Մեսրոպեանի կարիքաւոր աշակերտներու հիմնադրամին: Ընթրիքին հանդիսավարեց տիկին Աննա Անթունեան, գեղարուեստական մասով ելոյթ ունեցաւ Մեսրոպեանի աշակերտուհի Նանոր Առնէլեան, իսկ յատուկ այս առիթով մայր հայրենիքէն ժամանած հանրածանօթ երգչուհի Արփին երեկոյին հաղորդեց մեծագոյն ցնծութիւն` հայկական եւ եւրոպական երգերու կատարումներով:

Տեղեկատուական գրասենեակ
Հայ Կաթողիկէ Մեսրոպեան Բարձրագոյն Վարժարանի

Share Button

Leave a Reply

Your email address will not be published. Required fields are marked *

Լրատուութեան գործընկեր