• London

  • Beirut

  • Moscow

  • Los Angeles

  • Paris

  • Sydney

  • Toronto

Մելգոնեան Համաշխարհային Նախաձեռնութիւն

07.02.2019   23:24

Melkonian Global Overture

«Ապրող Սփիւռք» ձեռնարկը

ՆՈՐ ՕՐ, ԼՈՍ ԱՆՃԵԼԸՍ.- «Մելգոնեան Համաշխարհային Նախաձեռնութիւն» կազմակերպութիւնը գեղեցիկ գաղափարը ունեցած էր Եու. Սի. Էլ. Էյ.-ի հայագիտական ամպիոնի հաստատման յիսնամեակի առիթով, միօրեայ ձեռնարկներու շարք մը կազմակերպել համալսարանի «Մելնից» եւ «Ռոյս» սրահներուն մէջ։

19 Յունուար 2019 կ.ե. ժամը 3։30-ին, «Մելնից» սրահին մէջ տեղի ունեցան հայոց լեզուի արմատներուն կապակցութեան, արդի վիճակին եւ ապագային մասին կարճ ուսումնասիրութիւններ, ներկայացուած մասնագէտներու կողմէ։

Գալուստ Կիւլպէնկեան հաստատութեան Հայկական բաժնի վարիչ Դոկտ. Ռազմիկ Փանոսեանի բացման խօսքէն ետք բեմ հրաւիրուեցաւ ՀՀ Լոս Անճելըսի Գլխաւոր հիւպատոս Դոկտ. Արմէն Բայբուրդեանը, որուն յաջորդեցին քննարկումներու ներկայացումն ու հարց-պատասխանները։

Ասուլիսին նիւթերուն գլխաւոր ներկայացուցիչներն էին Դոկտ. Արմէն Բայբուրդեան, Անահիտ Պօղոսեան, Լիլիթ Ղազարեան եւ Վահէ Պէրպէրեանը (վիտէով մասնակցութեամբ)։

Լոս Անճելըսի հայկական (Ռոզ եւ Ալէքս Փիլիպոս, Ֆերահեան, Մեսրոպեան, Մանուկեան-Տեմիրճեան) եւ հանրային (Կլենտէյլ, Հուվըր, Քրէսէնթա Վէլի եւ Քլարք) վարժարաններէն շուրջ 400 հայ աշակերտներ եւ աւելի քան 250 հանդիսականներու ներկայութեան հրամցուած նիւթերը մեծապէս գնահատուեցան ներկաներուն կողմէ։ Ցաւալի պարագան այն էր, որ սրահի սահմանափակ աթոռներու պատճառաւ, մօտ 300 անձեր չկրցան վայելել ասուլիսը։ Այս «դուրս մնացած» անձերուն համար կարգադրուեցաւ, որ անոնք կարենան հարցազրոյցին երկրորդ մասին մասնակցիլ։

Երկրորդ ասուլիսին կը մասնակցէին ՀՀ Կրթութեան եւ գիտութեան նախարար Տիար Արայիկ Յարութիւնեան, Նարեկացի ամպիոնի դասախօսներէն Փրոֆ. Փիթըր Քաուի, Փրոֆ. Յակոբ Կիւլլիւճեան, Փրոֆ. Անահիտ Քէշիշեան եւ Փրոֆ. Շուշան Կարապետեան, ինչպէս նաեւ Հայոց պատմութեան «Ռիչըրտ Յովհաննէսեան» ամպիոնէն Փրոֆ. Սեպուհ Արսլանեան։ Բեմին վրայ էին նաեւ հայագիտական բաժինէն երկու երիտասարդ ուսանողներ։ Ասուլիսին նիւթն էր «Հայկական ինքնութիւն»ը։

Պէտք է ուրախութեամբ շեշտել, որ զոյգ ասուլիսներու պարագային ալ ներկայ հայ աշակերտութիւնը մեծ խանդավառութեամբ կը հետեւէր խօսողներուն։ Նիւթը ոչ միայն արդիական էր եւ պատանիները հետաքրքրող, այլ ներկայացնողներն ալ գիտցան ճիշդ ձեւով ներկայացնել նիւթը, մանաւանդ՝ պատանիներուն համար դարձնել հետաքրքրական։

Ասուլիսներէն ետք աշակերտութիւնն ու հանդիսականները ուղղուեցան «Ռոյս հոլ» ներկայ գտնուելու եւ վայելելու երաժշտական երեկոն։

Հազար երկու հարիւրէն (1200) աւելի հիւրեր աւելի քան երկու ժամ վայելեցին Կրէկ Հոշարեանի 40 հոգինոց “Armenian Pops Orchestra”-ին հրամցուցած 14 ազգային-ժողովրդական երգ-երաժշտութիւնն ու երկու պարերը։ Նուագախումբին մեներգիչներն էին Ալին Առուստամեան, Այլին Արթին, Յովիկ Տէմիրճեան (յատկապէս Կիպրոսէն հրաւիրուած), Արմին, Թայնի Թի, եւ հռչակաւոր թմբկահար՝ Ճէյքըպ Արմէն։ Մասնակցող պարախումբերն էին ՝ «Քարաւան Տէնս Սթիւտիո»յի եւ Միհրան Կիրակոսեանի պարախումբերը։

Երաժշտական երեկոյին իրենց ներկայութեամբ կը պատուէին Քալիֆորնիոյ Ծերակուտական Էնթընի Փորթանթինոն, Էսէմպլիմէմպըր Ատրին Նազարեանը եւ Լոս Անճելըսի Քաղխորհուրդի անդամ Փօլ Գրիգորեանը։ Պետական երեք հիւրերն ալ գնահատագիրներով բարձրօրէն պատուեցին «Մելգոնեան Համաշխարհային Նախաձեռնութեան» կատարած աշխատանքը, մանաւանդ այս ձեռնարկին առիթով հարիւրաւոր հայ աշակերտները համախմբելով եւ այս մտաւորական-ազգային-երաժշտական վայելքը անոնց հրամցնելով։ Բարձրօրէն գնահատուեցաւ նաեւ Մ.Հ.Նախաձեռնութեան (MGO) տեսլականը եւ առաքելութիւնը, որն է «սերմանել հայ լեզուի եւ մշակոյթի սէրը երիտասարդութեան մէջ, զօրացնել սփիւռքի հայ երիտասարդութեան մէջ հայկական ոգին եւ ծառայել սփիւռքի մէջ գործող զանազան հայկական հաստատութիւններուն»։ Այս ուղղութեամբ արդէն իսկ 31 Հոկտեմբեր 2018 թուականին 20,000 տոլար յատկացուած էր Եու. Սի. Էլ. Էյ. Նարեկացի Հայագիտական ամպիոնին, 10,000 տոլար Վենետիկի մէջ գտնուող «Պօ-Արաքս» Մշակութային Միութեան որպէս կրթաթոշակ եւ ընթացիկ ծախսերու համար, 10,000 տոլար «Զարմանազան» Արեւմտեան լեզուի Ամառնային բանակումին, ինչպէս նաեւ 3,000 տոլար՝ Կիպրոսի Սբ. Աստուածածին Պատանեկան երգչախումբին, որոնց համերգը տեղի ունեցաւ Մելգոնեան Կրթական Հաստատութեան կալուածին վրայ։

Մելգոնեան Համաշխարհային Նախաձեռնութեան պատասխանատուները, մասնաւորաբար հիմնադիրներ Տէր եւ Տիկ. Պէնօ եւ Արսինէ Շիրվանեանները, պատրաստ են իրենց հայակերտման այս աշխատանքները շարունակելու եւ ծառայելու մանաւանդ հայ երիտասարդութեան մէջ վառ պահելու հայ լեզուն եւ հայու ոգին։ Այս նպատակով, 25,000 տոլար պիտի նուիրուի 2019 թուականին։

Ջերմօրէն կը շնորհաւորենք Մելգոնեան Համաշխարհային Նախաձեռնութիւնը

(Melkonian Global Overture) եւ ամբողջական յաջողութիւն կը մաղթենք անոր։

 

 

Share Button

One response to “Մելգոնեան Համաշխարհային Նախաձեռնութիւն”

  1. Mihran Jizmejian says:

    Շնորհաւորելի նախաձեռնութիւն:

Leave a Reply

Your email address will not be published. Required fields are marked *

Լրատուութեան գործընկեր