• London

  • Beirut

  • Moscow

  • Los Angeles

  • Paris

  • Sydney

  • Toronto

ՀԲԸՄ-ի Վաչէ եւ Թամար Մանուկեան արուեստի կեդրոնին մէջ՝ Առնօ Բաբաջանեանին նուիրուած գեղարուեստական ճոխ երեկոյ

07.02.2019   23:15

ՆՈՐ ՕՐ, ԼՈՍ ԱՆՃԵԼԸՍ.- Փետրուար 2-ը Լոս Անճելըսի մէջ պիտի յիշուի որպէս առնօբաբաջանեանական օր։ ՀԲԸՄ-ի Արեւմտեան Ամերիկայի Շրջանակային յանձնաժողովին կազմակերպութեամբ երաժշտական վայելքի պահեր ապրեցաւ լոսանճելըսահայութիւնը այդ երեկոյ, արդիական բոլոր լրացումներով յագեցած արուեստի նորաբաց կեդրոնին մէջ՝ Փասատինա, ուր հարիւրաւոր երաժշտասէրներ ըմբոշխնեցին դասական ու էսթրատային կատարումներ։

Գովելի էր կազմակերպչական յանձնախումբին աշխատանքը, ունենալով կամաւորներու խմբակ մը, ՀԲԸՄ-ի գրասենեակի պաշտօնէութիւնը, ինչպէս նաեւ օժանդակութիւնը անհատներու եւ կազմակերպութիւններու, որոնց կարգին յատկապէս կարեւոր եղած էր մեծանուն արուեստագէտին որդւոյն՝ Արայիկ Բաբաջանեանին ներդրումը։

Այդ երեկոյ առաջին անգամ ըլլալով հնչեց ՀԲԸՄ-ի Լոս Անճելըսի երգչախումբը. խումբ՝ որ երիտասարդ խմբավար Գայիանէ Բաղդասարեանի խմբավարութեամբ իր նորամուտը նշեց հրամցնելով «Տղերքը որոնք չկան» եւ «Ազգ փառապանծ»։ Կը շնորհաւորենք, մաղթելով յարատեւ յաջողութիւններ։

Հանդիսավարն էր երիտասարդ արուեստագէտ Գայիանէ Աւետիսեան, որ հերթաբար ներկայացուց մասնակից արուեստագէտները, փորձելով աշխոյժ կապ հաստատել հանդիսականներուն հետ։

Բարի գալստեան եւ բացման խօսքի համար հրաւիրուեցաւ ՀԲԸՄ-ի Արեւմտեան Ամերիկայի Շրջանակային յանձնաժողովի ատենապետուհի Տիկ. Թալին Եագուպեան, որ ողջունեց ներկաները, շեշտելով մշակութային միջոցառումներու կարեւորութիւնը համայնքային մեր կեանքէն ներս։

Հանդիսավար Աւետիսեան անդրադարձաւ Բաբաջանեանի կեանքին. իսկ մեծ պաստառի վրայ ցոյց տրուեցաւ մեծ երաժիշտին նուիրուած տեսանիւթ։

Առաջին մասով ներկաները ըմբոշխնեցին «Վաղարշապատի պարը» եւ «Էլեգիա» (Ալէն Տիշիկրիքեան), ապա «Թրիօ՝ ջութակի, թաւջութակի եւ դաշնամուրի համար»  (Արմէն Տէր Գէորգեան, Արմէն Քսաջիքեան եւ Արմէն Կիւզելիմեան), որուն յաջորդեց «Նոկթիւրն»-ը՝ Արմէն Կիւզելիմեանի բարձր վարպետութեամբ։ Ընդմիջումէն առաջ ելոյթ ունեցաւ երգչախումբը վերոյիշեալ երկու խմբերգներով։ Իսկ մինչ այդ, երիտասարդ այլ արուեստագիտուհի մը՝ Սոնա Նալբանդեան հնչեցուց Բաբաջանեանի «Վոկալիզ»-ը, որ յատկապէս գրուած է մեծատաղանդ Լուսինէ Զաքարեանին համար։

Երկրորդ մասով Առնօ Բաբաջանեանի էսթրատային գործերն էին ներկայացուած։ Շնորհալի երգիչ-երգչուհիները, նոյնքան հրաշալի նուագախումբի ընկերակցութեամբ (Ռոմա Քանեան, Արմէն Գալալեան, Կարօ Սարաֆեան եւ Գագիկ Թորոյեան) նմուշներ ներկայացուցին Առնօ Բաբաջանեանի երաժշտական վաստակէն. Անի Քրիստի, Նարեկ Մակարեան, Էմմի, Սարգիս Մանուկեան եւ Ռազմիկ Մանսուրեան տրամադրութիւնները հասցուցին բարձրակէտին մեներգելով ռուսական եւ հայկական ստեղծագործութիւններ, ինչպէս «Սիրոյ երգ», «Կամուրջներ», «Երեւանի սիրուն աղջիկ», «Չքնաղ երազ», «Առաջին սիրոյ երգ», «Իմ Երեւան»։ Համերգը եզրափակուեցաւ «Մեր սիրելի Երեւան» երգով, որ կատարեցին բոլոր վեց երգիչ-երգչուհիները եւ ՀԲԸՄ-ի երգչախումբին անդամները։

Կը շնորհաւորենք կազմակերպիչ մարմինները, հովանաւորները՝ գլխաւորութեամբ Տէր եւ Տիկ. Շահան եւ Նելլի Եագուպեաններուն, եւ մանաւանդ հանդիսութեան բոլոր մասնակից արուեստագէտները։

Հարուստ էր բեմը՝ գործ արուեստագէտ Մանուկ Սաթամեանի։ Այս առիթով պատրաստուած էր նաեւ յայտագիր-գրքոյկ մը, յաւելեալ փայլք տալով Առնօ Բաբաջանեանին նուիրուած այս յուշ-երեկոյին։

Համերգը իրենց ներկայութեամբ պատուեցին Արեւմտեան թեմի Առաջնորդ Յովնան Սրբազանը, Գլխաւոր հիւպատոս Տէր եւ Տիկ. Արմէն Բայբուրդեանը, քաղաքական դէմքեր՝ Անթընի Փորթանթինոն, Ատրին Նազարեանը։

 

ՀՐԱՉ ՍԵՓԵԹՃԵԱՆ

Share Button

Leave a Reply

Your email address will not be published. Required fields are marked *

Լրատուութեան գործընկեր