• London

  • Beirut

  • Moscow

  • Los Angeles

  • Paris

  • Sydney

  • Toronto

Հայ Աւետ. Գոլէճի 95Ամեակի Պաշտօնական Կալա Ընթրիքը

01.12.2018   01:55

Քաղաքի Հայ աւետարանական գոլէճը, որ 1943էն ի վեր սեփականութիւնն է Պէյրութի Հայ աւետ. Ա. եկեղեցիին, 1923ի իր հիմնադրութեան 95ամեակը նշեց պաշտօնական կալա ընթրիքով մը, Տըպայէի «Լը Ռոյալ» պանդոկի Ազուրիա ընդարձակ ճաշարանին մէջ:

Պաշտօնական կալա ընթրիքին ներկայ էին ՄԱՀԱԵ միութեան նախագահ Վեր. Մկրտիչ Գարակէօզեան, նոյն միութեան կեդրոնական մարմինի ատենապետ եւ Հայկազեան համալսարանի նախագահ վեր. դոկտ. Փոլ Հայտոսթեան իրենց տիկիններով, Լիբանանի հայոց առաջնորդ Նարեկ արք. ի ներկայացուցիչ տ. Միքայէլ քհնյ. Տէմիրճեան, Պէյրութի Հայ կաթողիկէ պատրիարքական թեմի օգնական եպիսկոպոս հ. Գէորգ եպս. Ասատուրեան, պետական երեսփոխաններ Յակոբ Թերզեան եւ Ժան Թալուզեան, նախկին նախարար Վրէժ Սապունճեան, նախկին երեսփոխաններ, հանգամանաւոր այլ անձնաւորութիւններ, Ա. եկեղեցիի հովիւը, դպրոցի հոգաբարձութիւնը եւ եկեղեցիի վերին մարմիններու անդամներ, ՀԱԳի շրջանաւարտներ եւ բարեկամներ:

Կալա ընթրիքին թամատա պրն. Աւօ Թիւթիւնճեանի հրաւէրով Հայ աւետ. Ա. եկեղեցիի հովիւ վեր. Հրայր Չոլագեան աղօթք մատուցանեց, որմէ ետք բեմ հրաւիրուեցաւ Հայ աւետ. գոլէճի 1967-2017 տարիներու վաստակաւոր տնօրէն, ներկայիս պատուակալ տնօրէն եւ կալա-ընթրիքի յանձնախումբի ատենապետ դոկտ. Զաւէն Մսըրլեանը բացման խօսքին համար:

Ան նշեց, որ անհատներու կեանքին մէջ 95 տարին յառաջացեալ ծերութեան տարիք է, բայց հաստատութիւններու պարագային այդ կը նշանակէ 95 տարիներու հարուստ  փորձառութիւն: Ապա պատուակալ տնօրէնը հակիրճ կերպով անդրադարձաւ յետեղեռնեան հայ սփիւռքի առաջին հայ երկրորդական վարժարանը (հայ սքուլ) հանդիսացող դպրոցին պատմութեան դրուագներուն: Նշեց, թէ դպրոցը ազգին տուած է 1595 շրջանաւարտներ, որոնք պատուաբեր դիրքերու հասած են կեանքի մէջ: Խօսքը աւարտեց՝ նշելով, որ ՀԱԳի  ջահը առկայծ է եւ կը պատրաստուի դիմագրաւելու իր հարիւրամեակը:

Միակտոր գործադրուեցաւ գեղարուեստական ճոխ յայտագիր մը՝ կատարողութեամբ Հուրի Աբարդեան – Ֆրետլիի եւ Զուիցերիայէն ժամանած ճազ նուագախումբին (Օլիվըր Ֆրիտլի, Բիուս Պաշնակըլ եւ Անտրէ Փուզազ), որոնք ներկայացուցին հայկական եւ միջազգային ճազի կատարումներ:

Կալա ընթրիքին դպրոցի տնօրէն դոկտ. Արմէն Իւրնէշլեան իր հակիրճ ելոյթին մէջ շեշտեց, որ իմաստութիւնն ու խրատը ճանչնալու եւ հանճարներուն խօսքերը ըմբռնելու համար (դպրոցին նշանաբանը) դրամը, աշակերտներուն թիւը, տարիներու վաստակը ու այլ նիւթական միջոցներ իսկական արժէքի եւ որակաւոր արդիւնքի կը վերածուին յանձնառու, գիտակից ու նուիրեալ աշխատանքով, որ կ’իրականանայ Ամենակալ Աստուծոյ ապաւինելով ու Անոր ողորմութեան վստահելով: Իսկ Հայ աւետարանական գոլէճը իր այսօրին հասած է ու վաղուան կը նայի այդ հաւատքով:

Ուրախ մթնոլորտի մը մէջ տեղի ունեցաւ վիճակահանութիւն, ուր յատկապէս արուեստի գործեր եւ այլ արժէքաւոր նուէրներ կային:

Յանձնախումբին անունով տիկ. Սիլվա Սողոմոնեան քաջալերեց ներկաները գործնականօրէն  աջակից ըլլալու հայ դպրոցին եւ ապա ծանոյց կալա–ընթրիքէն առաջ եւ անոր ընթացքին եղած նուիրատուութիւնները:

 Կալա-ընթրիքի վերջաւորութեան խօսք առաւ դպրոցի հոգաբարձութեան ատենապետ պրն. Ներսէս Պաղտոյեանը: Ան Կանտիի հետեւողութեամբ նշեց, որ Հայ աւետ. գոլէճը ինքնին պատգամ մըն է յոյսի, սիրոյ եւ հաւատքի: Ան շեշտեց, որ սրահին մէջ ներկաները, իրենց ներկայութեամբ, նաեւ հաւատքի, յոյսի եւ սիրոյ պատգամ մըն է, որ կը ղրկեն Հայ աւետ. գոլէճին, որ դէպի իր հարիւրամեակը կը խոյանայ: Ապա գնահատեց 95ամեակի գոյգ ձեռնարկներու յանձնախումբերը, եւ արուեստագէտներուն յանձնեց յուշանուէրներ: Հուսկ ան բեմ հրաւիրեց վերապատուելիներ՝ Գարակէօզեանը, Հայտոսթեանը եւ Չոլագեանը, դոկտորներ՝ Մսըրլեանը եւ Իւրնէշլեանը, իրեն հետ միատեղ հատելու 95ամեակի կարկանդակը:

Ներկաներ գոհ եւ ուրախ տրամադրութեամբ հեռացան սրահէն, յաջող ձեռնարկի աւարտին:

Share Button

Մեկնաբանել

Լրատուութեան գործընկեր