• London

  • Beirut

  • Moscow

  • Los Angeles

  • Paris

  • Sydney

  • Toronto

ՀԲԸՄ-ի Վաչէ եւ Թամար Մանուկեան երկրորդական վարժարան. Մեծարանքի օր՝ նուիրուած մեծ հայրերու եւ մեծ մայրերու

21.09.2018   01:52

Կազմակերպութեամբ ՀԲԸՄ-ի Վաչէ եւ Թամար Մանուկեան վարժարանի Հայկական բաժանմունքին, Ուրբաթ, 7 Սեպտեմբեր 2018-ի առաւօտուն, վարժարանիս Պօյաճեան հանդիսասրահէն ներս, այս տարի եւս տեղի ունեցաւ մեծարման հանդէս, նուիրուած՝ աւարտական դասարանի աշակերտներու մեծ ծնողներուն։

Կ’արժէ այստեղ նշել, թէ մեր գաղութէն ներս առաջին պաշտօնական «Մեծ հայրերու եւ մեծ մայրերու» նուիրուած տօնախմբութիւնը կազմակերպուած էր նոյն կեդրոնէն ներս, 7 Սեպտեմբեր 2011-ին, ՀԲԸՄ-ի Երուանդ Պապայեան հիմնարկի Ազգանուիրում ծրագիրի ծիրէն ներս: Այս տօնախմբութեան ստեղծած խանդավառութենէն քաջալերուած, ՀԲԸՄ-ի Պապայեան Մանկավարժական հիմնարկը որոշեց «Մեծ հայրերու եւ մեծ մայրերու օրուան տօնակատարութիւնը ընդգրկել իր գործունէութեան ծիրէն ներս։ Յաջորդական տարիներու տօնակատարութիւնները եկան փաստելու, թէ այս տօնը նշելու աւանդութիւնը մեր գաղութէն ներս ամրօրէն հաստատուեցաւ ՀԲԸՄ-ի Պապայեան Մանկավարժական հիմնարկին կողմէ։

Այդ առաւօտ վարժարան հրաւիրուած էին աւարտական դասարանի աշակերտներու մեծ ծնողները։ Յուզիչ էր տեսարանը, երբ աշակերտներ իրենց մեծ ծնողները դիմաւորեցին գիրկընդխառնումով եւ ապա տօնակատարութեան ամբողջ տեւողութեան անոնց կողքին բազմեցան։

Յայտագիրը սկսաւ վարժարանիս տնօրէն՝ տիար Մայքըլ Փրէթի ողջոյնի խօսքով։ Ապա տնօրէնը բեմ հրաւիրեց հայերէն լեզուի դասատու՝ տիար Պարթեւ Կիւլիւմեանը, որ աղօթքով սկսի օրուան հանդիսութիւնը եւ փոխանցէ օրուան պատգամը։ Տիար Պարթեւ Կիւլիւմեան իր խօսքին մէջ ողջունելէ ետք մեծ ծնողները, նախ կարեւորութեամբ խօսեցաւ մեծ ծնող ըլլալու Աստուածային օրհնութեան մասին, կոչ ուղղելով անոնց՝ հոգեւոր իմաստութեամբ կրթելու իրենց թոռները։ Ապա, իր խօսքը ուղղելով աշակերտ թոռներուն, թելադրեց որ երկիւղալի սրբութեամբ վերաբերին իրենց մեծ ծնողներուն հետ եւ պատուեն զանոնք, խնամք ցուցաբերելով անոնց՝ իրենց յառաջացած տարիքին մէջ, եւ անոնցմէ սորվին կեանքի իմաստուն դասեր։

Աւարտական դասարանի աշակերտները, որոնք յատուկ բացիկներ պատրաստած էին իրենց մեծ ծնողներուն, բեմ բարձրացան եւ խոր զգացումներով ու արտասուաթոր աչքերով կարդացին իրենց գրած սրտէ բխած մաղթանքները։ Շատ

 

յուզիչ էր պահը եւ աննկարագրելիօրէն սքանչելի։ Անոնց գրութիւնները լի էին շնորհակալական ու երախտագիտութեան խորունկ զգացումներով՝ հանդէպ իրենց մեծ ծնողներուն։

Թոռներու այս սրտառուչ խօսքերէն ազդուած, մեծ ծնողներ իրենք եւս իրենց կարգին խօսք առին եւ օրհնեցին իրենց թոռները եւ բոլոր զաւակները, յիշեցնելով անոնց տէր կանգնելու հայկական ինքնութեան, հաւատքին ու սրբազան լեզուին։

Հուսկ բանքը արտասանեց վարժարանիս տնօրէնը, որ անգամ մը եւս շնորհաւորեց աշակերտներու մեծ ծնողները, եւ իր ուրախութիւնը յայտնեց այս ձեռնարկի կազմակերպման յաջողութեան համար։

Հաւաքական լուսապատկեր առնելէ ետք, տեղի ունեցաւ պատշաճ հիւրասիրութիւն, ի պատիւ մեծ հայրերուն եւ մեծ մայրերուն։

ԹՂԹԱԿՑՈՒԹԻՒՆԸ ՎԱՐԺԱՐԱՆԷՆ

 

 

Share Button

Մեկնաբանել

Լրատուութեան գործընկեր