• London

  • Beirut

  • Moscow

  • Los Angeles

  • Paris

  • Sydney

  • Toronto

ՀԲԸՄ-ի Պօղոս Գ. Կարմիրեան Վարժարան – Միջնակարգի Վկայականաց Բաշխման Հանդէս

07.07.2018   12:24

Շաբաթ,  30 Յունիս  2018-ին՝ երեկոյեան  ժամը  6:30-ին, տեղի  ունեցաւ  Պօղոս  Գ.  Կարմիրեան  վարժարանի  միջնակարգի  վկայականներու  բաշխման  հանդիսութիւնը՝  հովանաւորութեամբ  ՀԲԸՄ-ի կրթական  յանձնախումբին:

 Լիբանանի,  Հայաստանի,  ՀԲԸՄ-ի  եւ վարժարանիս  քայլերգերու  յոտնկայս  ունկնդրութենէն  ետք, հանդէսի  բացման  խօսքը  կատարեց   օրիորդ  Հայկօ  Տօլմայեան, որ  ողջունելէ  ետք  ներկաները ըսաւ. «Մեր վարժարանը  փոքրիկ  աշխարհ  մըն է  ուսանողներուն  համար,  հոս  կը  հանդիպին ամէն  բանի, որ  կեանքին  մէջ պիտի  պատահի, հոս կը  վարժուին  ազնիւ  ու  բարեկիրթ  ըլլալու,  կը  զարգանայ իրենց  ընկերային  դիմագիծը,  կը  կազմուի  անոնց  կրօնական  ու  բարոյական  նկարագիրը:  Հոս  կը  սորվին  ճանչնալ ու  սիրել  Աստուած,  ընտանիք  ու  հայրենիք»: Ապա  շնորհակալութիւն  յայտնեց բոլոր  անոնց, որոնք  նպաստեցին  հանդիսութեան  յաջողութեան:

   Բացման  խօսքէն  ետք  հանդէս  եկան    շրջանաւարտները «The  Truth» թատերական  ներկայացումով  մը,  որուն  նիւթը  առնուած էր  հայ  աշխարհահռչակ  գիւտարար Ռայմոնտ  Տամատեանի՝ «Gifted  Mind» գիրքէն:   Ռայմոնտ  Տամատեան  1969-ին ստեղծած  է  բժշկութեան  մէջ  անփոխարինելի  Magnetic Resonance Imaging (MRI)  ախտորոշման  սարքը: Թատերգութեան  նիւթը եւ աշակերտներու   անթերի ներկայացումն  ու հոյակապ    բեմայարդարումը, որ  մտայղացումն էր օրիորդ  Հայկոյին,  բացառիկ  ներդաշնակութիւն  մը  ստեղծած էին,   յատկանշական  էր  նաեւ  Նանոր  Մաճառեանի (դաշնամուր) եւ Մարիա  Շէրպէթճեանի (ջութակ)  նուագը :

 Թատերգութենէն  ետք  բեմ  հրաւիրուեցաւ  վարժարանիս  տնօրէնուհին Տիկին  Մարալ  Պալեօզեան՝  փոխանցելու  իր  սրտի  խօսքը: Յարգելի  տնօրէնուհին   անդրադառնալով  անցնող    դպրոցական տարեշրջանին  ըսաւ. «Կարմիրեան  վարժարանը  կը  գտնուի    առաջնահերթ  դիրքերու  վրայ,  վկայ՝ մեր  ընթացքը  վերջին  տարիներուն  եւ պատրաստած  ներկայ  սերունդը,  որոնք  յաջորդական  տարիներ   առաջին  դիրքը  կը  խլեն  LAU-ի, Fabriano-ի թէ  այլ  մրցանքներու  մէջ»:  Ապա  աւելցուց. «Ipad-ի միջոցով   Ա.  դասարանէն  ներս  ամբողջացուցինք  բարեյաջող  առաջին  տարեշրջանը,  կիրարկեցինք  Eduvation-ի  ծրագիրը:  Մեր  յաջորդ  տարուան ծրագիրը  պիտի  ընդգրկէ  Բ.  դասարանը   եւ  այսպիսով  ու   մեծ  յոյսով  յաջորդական  տարիները  Ipad-ը  պիտի  ընդգրկուի  դիւրամատչելի  եւ  հաճելի  դարձնելու ուսուցումը»:  Շարունակելով  իր  խօսքը  Տիկին  Մարալ  աւելցուց. «Վարժարանի  կազմէն  խումբ  մը  մասնակցեցան Գալուստ  Կիւլպէնկեան  հիմարկին  հովանաւորած  Հայկազեանէն  ներս կայացող  վերաորակաւորման  դասընթացքներուն  եւ  սոյն  ծրագիրին  մասնակիցները   օժտուեցան ժամանակակից  մանկավարժական  գիտելիքներով,  եւ  օժտուած  այս  բոլորով  ու  լաւագոյնս  զինուած  յառաջիկայ  տարի  պիտի  բանինք  մեր  վերանորոգուած ու  արդիականացած  նորանոր  բաժիններով   բաղկացած  այս  կառոյցին  մէջ, վերանուանուած  ՀԲԸՄիութեան  վարժարաններ, ուր  պիտի  միաւորուին  ՀԲԸՄիութեան  երեք  վարժարաններու  սաները եւ  մէկտեղուելով  պիտի  միանանք,  միանալով  պիտի  զօրանանք, ուժեղանանք եւ շատանանք»: Տիկին  Մարալ  եզրափակելով  ըսաւ. «Խօսեցանք  վարժարանիս  համար  իրականացուող   առաջանդրանքներուն  եւ  ծրագիրներուն  մասին,  բայց այս  բոլորէն  վեր  գոյութիւն  ունի  մեր հայու  ոգին, որ  անմեռ  է  ու  մեծ  յաջողութեան  ու  փայլուն  յաղթանակի  հաւատքով  ու  հեռանկարով  պիտի  թեւակոխէ  անքակտելի  նոր  շրջան»:

  Տնօրէնուհիին  խօսքէն  ետք  հանդիսաւոր  կերպով  մուտք  գործեցին  շրջանաւարտները  ներկաներուն  յոտնկայս  ծափողջոյններուն  տարափին  տակ,  ապա  բեմ  հրաւիրուեցան  ՀԲԸՄիութեան  Լիբանանի շրջանակային  յանձնաժողովի   եւ կրթական  յանձնախումբի  ներկայացուցիչներ՝ Տիկին  Սիլվա  Լիպարիտեան  եւ  Պարոն Մայք Կիրիթլեան, ինչպէս  նաեւ տնօրէններ՝ Պարոն  Արա  Վասիլեան  եւ Տիկին Մարալ  Պալեօզեան՝ մասնակցելու   վկայականներու  յանձնումին:

  Նախքան վկայականներու  բաշխումը,  ցուցադրուեցաւ  տեսերիզ  մը  իւրաքանչիւր  շրջանաւարտի մասին՝ պատրաստութեամբ օրիորդ Հայկօ  Տօլմայեանի, ապա  աշակերտները  ստացան  իրենց  վկայականներն  ու  մրցանակները: Միջնակարգի  վկայականներ  ստացան Կիրիթլեան  Կարօ, Մարկոսեան Սէրուժ,  Նաճարեան Կարօ, Փարթամեան  Հրակ, Չերչեան  Արման,  Թոսունեան  Դալար  եւ  Եսայեան  Քրիսթէլ:

 Շրջանաւարտներու  անունով   ուղերձներ  կարդացին Կարօ  Կիրիթլեան  (հայերէն) եւ Կարօ  Նաճարեան  (արաբերէն), որմէ  ետք  ներկայացուցին  խմբերգ մը «We’re  All  In  This Together» խորագրով:

 Հուսկ,  դարձեալ  բեմ  բարձրացան  Տիկին  Մարալ  Պալեօզեանն ու  Պարոն Արա Վասիլեան  մրցանակաբաշխութեան  համար, մրցանակներ ստացան գերազանց,  բարձր  պատուոյ, պատուոյ յիշատակութիւն  ապահովող  խումբ մը  աշակերտներ, ինչպէս  նաեւ  լեզուներու, Հայոց  պատմութեան եւ  վարքի  առաջնութիւն  ապահովող  աշակերտներ:

   Հանդիսութեան  աւարտին  աշակերտները  շնորհաւորութիւններ  ընդունեցին  վարժարանիս  բակը,  ուր տեղի  ունեցաւ  հրավառութիւն  ու  կարկանդակի  հատում:

 

Share Button

Մեկնաբանել

Լրատուութեան գործընկեր