• London

  • Beirut

  • Moscow

  • Los Angeles

  • Paris

  • Sydney

  • Toronto

ՌԱԿ Լիբանանի Շրջանային Վարչութեան Այցելութիւնը Զահլէ

11.09.2017   05:22

   Երէկ, 10 Սեպտեմբեր  2017-ին, ՌԱԿ Լիբանանի Շրջանային Վարչութենէն պատուիրակութիւն մը, գլխաւորութեանբ ատենապետ Տոքթ.Աւետիս Տաքեսեանի այցելեց Զահլէ: Այցելութեան նպատակն էր աւելի մօտէն ծանօթանալ Զահլէի հայկական համայնքի զաւակներու առօրեայ կարիքներուն,  այցելել հայերու բարեկամ քաղաքական եւ կրօնական անձնաւորութիւններու:

    Զահլէի մուտքին պատուիրակութիւնը ընդունուեցաւ քաղաքի ՌԱԿ Մերճանեան ակումբի ատենապետ Ընկ. Գրիգոր Մկըրեանի եւ վարչական ընկերներու կողմէ: Պատուիրակութեան անդամները առաջին առիթով այցելեցին ՌԱԿ Մերճանեան ակումբը Մըաալլաքա շրջանին մէջ: Անոնք մօտէն ծանօթացան Զահլէի համայնքը յուզող հարցերուն:  Պատուիրակութեան միացաւ Պետական Երեսփոխան Շանթ Չինչինեան: 

     Ապա ՌԱԿ Լիբանանի Շրջանային Վարչութեան պատուիրակութիւնը,  Զահլէի ընկերները եւ Երեսփոխան Շանթ Չինչինեան  այցելեցին Լիբանանեան Ուժերու Զահլէ քաղաքի կեդրոնը, ուր ընդունուեցան Կուսակցութեան Զահլէի պատասխանատու Պարոն Միշէլ Թաննուրիի կողմէ: Ժողովականները քննարկեցին Լիբանանի եւ Պեքաայի  յուզող հարցերը: Անդրադարձ կատարուեցաւ ընտրական նոր օրէնքին եւ հաւանական համագործակցութեան հեռանկարներուն շուրջ: Ժողովի աւարտին կողմերը համաձայնեցան հերթական հանդիպումներ կայացնել համագործակցութիւնը ամրապնդելու համար:

    Պատուիրակութիւնը ապա այցելեց Հայ առաքելական Ս. Գրիգոր Լուսաւորիչ Եկեղեցի, ուր ներկայ գտնուեցաւ եկեղեցական արարողութեան, ապա հանդիպում մը ունեցաւ արժանապատիւ քահանայ հօր եւ թաղականութեան անդամներուն հետ:  Պատուիրակութիւնը իր զօրակցութիւնը յայտնեց ամէն ճիգի, որու նպատակն է համայնքը պահել բարգաւաճ եւ հայկական մշակոյթին մօտ:

    Ապա պատուիրակութեան անդամները ուղղուեցան Փաղանգաւոր Կուսակցութեան Զահլէի երեսփոխան Պարոն Էլի Մարունիի բնակարանը, ուր գումարուեցաւ ժողով մը, մասնակցութեամբ Զահլէի Փաղանգաւոր Կուսակցութեան պատասխանատուներու: Կողմերը համաձայնեցան զարգացնել յարաբերութիւնները երկու կուսակցութիւններուն միջեւ՝ ի շահ Լիբանանի եւ Զահլէի խաղաղասէր ժողովուրդին:

     Պատուիրակութեան յաջորդ հանդիպումը տեղի ունեցաւ Պեքաայի եւ Զահլէի Յոյն Կաթողիկէ  համայնքի խիզախ արքեպիսկոպոս Իսամ Տարուիշի հետ: Սրբազանը մեծ գոհունակութեամբ ընդունեց պատուիրակութեան անդամները եւ կարեւոր նկատեց կուսակցութիւններու դերը ժողովուրդին առօրեայ կեանքին մէջ: Ան նաեւ շեշտեց մարդը հաւատքին մօտեցնելու կարեւորութիւնը եւ միջոցներու  չզլանալը: Պատուիրակութեան անդամները արեւշատութիւն եւ կորով մաղթեցին սրբազան հօր:

   Պատուիրակութիւնը ապա այցելեց ՀԲԸՄ-ի «Ալեք Մանուկեան  Մշակոյթի Կեդրոն», ուր ընդունուեցաւ պատասխանատուներու կողմէ: Այցելութիւնը առիթ մը եղաւ մօտէն ծանօթանալու Միութեան Զահլէի գործունէութեան: ՌԱԿ Լիբանանաի Շրջանային վարչութեան պատուիրակութեան անդամներ խոստացան զօրավիգ կանգնիլ  Զահլէի ակումբին, համագործակցութեամբ Միութեան պատկան մարմիններուն, որպէս հայ ժողովուրդի երիտասարդական եւ մշակութային կեդրոն:

     Կէսօրուան դադարէ մը ետք, պատուիրակութեան անդամները հրաժեշտ տուին Զահլէի հայաբոյր գաղութին, նոր ծրագիրներով վերադառնալու յոյսով, ի փառս մեր սիրելի ժողովուրդին:

ՌԱԿ Լիբանանի Շրջանային Վարչութիւն

Share Button

Մեկնաբանել

Լրատուութեան գործընկեր