• London

  • Beirut

  • Moscow

  • Los Angeles

  • Paris

  • Sydney

  • Toronto

Ընթացք Առաւ Երեւանի Աւագանիի Ընտրութիւններու Քարոզարշաւը

23.04.2017   10:43

Ապրիլ 21-ին ընթացք առաւ Մայիս 14-ին կայանալիք Երեւանի աւագանիի ընտրութիւններուն քարոզարշաւը, որ պիտի տեւէ մինչեւ Մայիս 12-ը` ներառեալ:

Երեւանի քաղաքապետի ընտրութիւններուն կը մասնակցի երեք քաղաքական ուժ. Հայաստանի հանրապետական կուսակցութեան համամասնական ցուցակը կը գլխաւորէ գործող քաղաքապետ Տարօն Մարգարեան, «Ելք»ինը` պատգամաւոր Նիկոլ Փաշինեան, իսկ «Երկիր Ծիրանի»-ինը` Զարուհի Փոստանջեան:

Ընտրութիւններուն ՀՀԿ-ն կը մասնակցի «Յանուն Երեւանի» կարգախօսով: Ընտրութիւններուն մասնակցող միւս քաղաքական ուժի` «Ելք» դաշինքի կարգախօսը հետեւեալն է` «Երեւան ջան, ելք կայ»: Դաշինքը նաեւ տեսահոլովակ նկարահանած է, ուր կ’երգէ նաեւ դաշինքի համամասնական ցուցակը գլխաւորող Նիկոլ Փաշինեան:

Դաշինքի թեկնածուները ու համակիրները քարոզարշաւը սկսած են Ազատութեան պողոտայի վրայ գտնուող յուշահամալիրի մօտէն, ուրկէ օդապարիկներ  արձակած են երկինք, կը հաղորդէ «News.am»-ը:

«Ելք»-ը արդէն յայտարարած է նաեւ, թէ Ապրիլ 21-ին Մոսկովեան, Իսահակեան եւ Տէրեան փողոցներուն յարող հատուածէն  ընթացք պիտի առնէ երթ, որ պիտի աւարտի Հիւսիսային պողոտայ – Տէրեան խաչմերուկին յարող տարածքին մէջ, ուր պիտի կայանայ հաւաք եւ համերգ:

«Երկիր Ծիրանի»-ի առաջնորդ Զարուհի Փոստանջեան խոստացած է, որ կարգախօսը պիտի յայտնէ այսօր: Կուսակցութիւնը քարոզարշաւը պիտի սկսի հեծանիւի երթով, որ ընթացք պիտի առնէ Ազատութեան հրապարակէն, Ապրիլ 21-ին, ժամը 17:00-ին:

Մայիսի 13-ին լռութեան օր է, իսկ 14-ին պիտի կայանան ընտրութիւնները: Նշենք, որ պիտի ընտրուի 65 հոգինոց աւագանի: Երեք ուժերու մասնակցութեան պարագային անցողիկ շեմ սահմանուած չէ:

Share Button

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Media Partner